Zakir Həsənov əmr imzaladı - Polkovnikə yüksək vəzifə verildi
Müdafiə Nazirliyində yeni kadr təyinatı olub.
"Yeni Sabah"ın əldə etdiyi xəbərə görə, bu barədə müdafiə naziri general-polkovnik Zakir Həsənov müvafiq əmr imzalayıb.
Əmrə əsasən, polkovnik Rəşad Babayev müdafiə nazirinin müavini və nazirliyin baş direktoru Aqil Qurbanovun Katibliyinin rəisi təyin edilib.
O, bundan əvvəl Müdafiə Nazirliyinin Maliyyə Büdcə İdarəsinin rəisi olub.
Müdafiə Nazirliyi R.Babayevin yeni vəzifəyə təyin olunduğunu təsdiqləyib. Lakin qurum polkovnikin yeni vəzifəsinin adını açıqlamayıb.
"Müdafiə Nazirliyinin Maliyyə Büdcə İdarəsinin rəisi polkovnik Rəşad Babayev nazirlik daxili yerdəyişmə qaydalarına əsasən digər məsul vəzifəyə təyin olunub", - açıqlamada bildirilib.
Qeyd edək ki, Rəşad Babayev Aqil Qurbanovun ən yaxın adamlarından biri sayılır. R.Babayev əvvəllər Dövlət Gömrük Komitəsində işləyib. A.Qurbanov müdafiə nazirinin müavini, nazirliyin baş direktoru təyin olunandan sonra iş yerini Müdafiə Nazirliyinə dəyişib.
