Dələduzluqda ittiham olunan “Moon Kids” uşaq bağçasının direktoru Havvaxanım Rüstəmovanın cinayət işi üzrə məhkəmə prosesi keçirilib.

"Report"un məlumatına görə, Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə zərərçəkənlər ifadə verib.

Cinayət işində qızı zərərçəkən qismində tanınmış Vüqar İsmayılov deyib ki, onlara dəyən zərər ödənilib. Onun sözlərinə görə, internetdə sözügedən bağçanın elanı ilə qarşılaşıb və qızını oraya işə düzəltmək üçün müraciət edib:

"İnternetdə elan var idi. Bağçaya musiqi müəllimi axtarılırdı. Qızımla oraya getdim. Qızım bayırda gözlədi, mən içəri girdim. Havvaxanımın qəbulunda oldum. Dedi ki, işə düzəlmək üçün 3-4 min pul verməlisiz. Razılaşdıq, qızım işə düzəldi, 2 ay 300 manat maaş aldı. Sonra maaş verilmədi. Prokurorluğa müraciət elədim. Havvaxanımın atası 3 min manatını qaytardı, qalan 1000 manatını da onlara bağışladım", - o deyib.

Cinayət işində gəlni zərərçəkən kimi tanınmış Tarverdi Həsənovun sözlərinə görə, internetdə qarşılaşdıqları elan əsasında gəlnini işə düzəltmək üçün bağçaya müraciət ediblər:

"Dedilər işə düzəlmək üçün 5 min manat pul lazımdır. Sonra gəlnimə zəng edib dedilər ki, təcili pulu gətir, əks halda yerinə başqa adam götürəcəklər. Dedim, 5 min verə bilməyəcəm, 4 min manat verəcəm qalanını maaşdan çıxarsız. Gəlnim 2 ay işlədi, amma maaş almadı. Bir gün Havvaxımın yanına gəldim. Soruşdum ki, nə məsələdir? Dedi, narahat olma, gəlnin pulu alacaq. Sonra öyrəndim ki, Havvaxanımı tutublar. Atası ilə danışdım, dedim ki, bankdan pul götürüb sizə vermişəm. Heç olmasa, pulu qaytarın bankın borcunu bağlayım. Mənə 2 min manat verib sənədə qol çəkdirdilər. İstintaq zamanı çağırılanda dedim ki, mən razı deyiləm, pulumu qaytarsınlar. Atası 1100 manat verib xahiş etdi ki, məsələni bağlayaq".

Təqsirləndirilən Havvaxanım Rüstəmova deyib ki, Tarverdi Həsənovun gəlni ilə əmək müqaviləsi bağlanıb. Onun sözlərinə görə, təcrübə üçün sözügedən şəxsdən 4 min manat pul alınıb. O deyib ki, zərərçəkənə dəyən zərərdən qalan məbləğ də ödəniləcək.

Məhkəmənin növbəti iclası avqustun 4-ə təyin olunub.

Qeyd edək ki, təqsirləndirilən şəxs zərərçəkmiş şəxslərə vurduğu maddi ziyanın bir qismini ödəyib. Eyni zamanda zərərçəkmiş şəxslərin bir neçəsi ilə barışıq əldə olunub. İş üzrə Dövlət Sosial Müdafiə Fondu zərərçəkmiş kimi tanınıb.

Xatırladaq ki, Baş Prokurorluğun yaydığı məlumata görə, “Moon Kids” Məhdud Məsuliyyətli Cəmiyyətində yol verilən qanunsuzluqlarla bağlı Nizami rayon prokurorluğunda istintaq edilən cinayət işi üzrə MMC-nin direktoru Rüstəmova Havvaxanım İmamət qızı Cinayət Məcəlləsinin 178.2.2, 178.2.3, 178.2.4 (qulluq mövqeyindən istifadə etməklə təkrarən və xeyli miqdarda dələduzluq) və 308.1-ci (vəzifə səlahiyyətlərindən sui-istifadə) maddələrilə təqsirləndirilən şəxs qismində cəlb edilərək barəsində həbs qətimkan tədbiri seçilib.

Sonradan onunla bağlı olan həbs qətimkan tədbiri ev dustaqlığı ilə əvəz olunub. “Moon Kids” Uşaq Bağçasının fəaliyyəti dayandırılıb.