Azərbaycanda son illər aparılan islahatlar nəticəsində ölkə iqtisadiyyatı xeyli dərəcədə “ağardılıb”, şəffaflıq səviyyəsi yüksəlib.

"Report" xəbər verir ki, bunu iqtisadiyyat nazirinin I müavini Elnur Əliyev Bakıda "Sahibkarlar Günü"nə və "Konstitusiya və Suverenlik İli"nə həsr olunmuş "Konstitusiya və suverenlik - Azərbaycanda sahibkarlığın inkişafı" mövzusunda keçirilən konfransda bildirib.

"Azərbaycan dövləti daim müxtəlif platformalarla sahibkarları dəstəkləyir. Bu gün özəl sektor Prezident cənab İlham Əliyevin diqqəti və qayğısı ilə daha da inkişaf edir. Əmək müqavilələrinin sayı, vergi daxilolmaları əhəmiyyətli dərəcədə artıb. Sahibkarlar büdcə gəlirlərinin formalaşmasında önəmli rol oynayırlar. Bu ilin yanvar-mart aylarında qeyri-neft-qaz sektorundan vergi daxilolmaları 3,2 milyard manatdan çox olub ki, bu da ötən ilin eyni dövrünə nisbətən 11 %-ə yaxın artın deməkdir", - deyə o qeyd edib.