Moskvada Rusiya Səhiyyə Nazirliyinin "Rusiya Milli Tibbi Tədqiqat Radioloji Mərkəzi" Federal Dövlət Büdcə Müəssisəsinin elmi şurasının iclası keçirilib. İclas Rusiya Elmlər Akademiyasının akademiki Məmməd Əliyevin 70 illik yubileyinə və onun "Sümük və yumşaq toxuma şişləri" elmi rəhbərliyinin təqdimatına həsr olunub.

“Report”un yerli bürosunun məlumatına görə, tədbirdə Rusiya və beynəlxalq tibb sahəsinin nümayəndələri iştirak ediblər.

İclasda çıxış edən Azərbaycanın Rusiyadakı səfiri Rəhman Mustafayev Prezident İlham Əliyevin akademik Məmməd Əliyevin "Şərəf" ordeni ilə təltif edilməsi haqqında Sərəncamını oxuyub. Diplomat həmçinin akademikin yeni müalicə üsulları və cərrahi yanaşmaların işlənib hazırlanmasına verdiyi töhfəni qeyd edib, bunu onun elmi bioqrafiyasının mühüm tərkib hissəsi adlandırıb.

"Bu gün sizin rəhbərliyiniz altında Rusiya, Azərbaycan və xarici alimlərin bütöv bir nəsli formalaşıb. Uzun müddət Ümumrusiya Azərbaycan Konqresinə rəhbərlik etmisiniz. Bu qurum Vladimir Putinin prezident kampaniyası ilində yaradılmışdı. Konqres Azərbaycan və Rusiya arasında əlaqələrin hərtərəfli inkişafına yönəlmişdi", - R.Mustafayev bildirib.

Tibb elmləri doktoru, professor, Rusiya Elmlər Akademiyasının (EA) akademiki Andrey Kaprin Rusiya Prezidenti Vladimir Putindən gələn təbrik teleqramını oxuyub.

Rusiya EA-nın akademiki Mark Kutser qeyd edib ki, M.Əliyev onkoloji məktəbin yaradılması üçün çox iş görüb: "Sağlamlıq, xoşbəxtlik və yaradıcılığında uğurlar arzulayıram. Çünki Məmməd Əliyev bu gün böyük alim, onkoloq, pedaqoq, on minlərlə həyatı xilas etmiş həkimdir. Onkoloji məktəbin yaradılması üçün çox iş görüb".

Qeyd edək ki, aprelin 8-də Prezident İlham Əliyev Azərbaycanla Rusiya arasında əlaqələrin inkişafında böyük xidmətlərinə və uzunmüddətli səmərəli ictimai fəaliyyətinə görə akademik Məmmədbağır Cavad oğlu Əliyevin "Şərəf" ordeni ilə təltif edilməsi haqqında Sərəncam imzalayıb.

Xatırladaq ki, Məmmədbağır Əliyev azərbaycanlı və rusiyalı onkoloq-həkim, professor, tibb elmləri doktoru, Rusiya Elmlər Akademiyasının akademikidir. O, Ümumrusiya Azərbaycan Konqresinin ilk prezidenti (2001-2016) olub. O həm də “Dostluq” ordeni ilə təltif olunub.