"Əlillik vəziyyətinin qiymətləndirilməsi prosesində həkimməsləhət komissiyalarının göndərişlərinin çox vaxt “natamam” hesab olunması qiymətləndirmədə gecikmələrə səbəb olur.Bu baxımdan, prosesdə iştirak edən qurumlar arasında koordinasiyalı və qarşılıqlı etimad prinsipinə əsaslanan fəaliyyətin təmin edilməsi, həmçinin qiymətləndirmə prosedurlarının sadələşdirilməsi zəruridir".

"Yeni Sabah" xəbər verir ki, bu sözləri Azərbaycan Respublikasının İnsan Hüquqları üzrə müvəkkili Səbinə Əliyeva Ombudsmanın 2025-ci ildə ölkədə insan hüquqlarının qorunması haqqında illik məruzəsinin təqdimi zamanı deyib.

Ombudsman qeyd edib ki, əlilliyi olan şəxslərin hüquqlarının daha səmərəli təmin olunması məqsədilə infrastruktur obyektləri və yaşayış binalarının layihələndirilməsi zamanı onların tələbatları nəzərə alınmalı, tikinti prosesində müyəssərlik tələblərinə riayət olunmasına nəzarət gücləndirilməli, monitorinqlər aparılmalı və çatışmazlıqlar aradan qaldırılmalıdır. Eyni zamanda, metro və digər ictimai nəqliyyatın əlçatanlıq komponentləri ilə təmin olunması üçün konkret mexanizmlər hazırlanmalı və tətbiq edilməlidir.

S.Əliyeva əhalinin sağlamlıq hüququnun təminatı üçün regionlarda ixtisaslaşdırılmış tibbi xidmətlərin əlçatanlığının artırılmasını və səhiyyə infrastrukturunun ölkə üzrə balanslı şəkildə təşkili, həmçinin ilkin səhiyyə xidmətlərinin keyfiyyətinin yüksəldilməsinin vacib olduğunu diqqətə çatdırıb.