Heç kimi məcbur etmək olmaz ki, kollegiya ilə müqavilə imzalasın.

"Report" xəbər verir ki, bunu Vəkillər Kollegiyasının (VK) sədri Anar Bağırov “Konstitusiya və Suverenlik İli” çərçivəsində keçirilən VK-nın Rəyasət Heyətinin geniştərkibli iclası və vəkilliyə namizədlərin təntənəli andiçmə mərasimində deyib.

O qeyd edib ki, vəkilliyə qəbulun çətinləşdirilməsi doğru deyil:

"Vəkillik azad peşədir. Biz heç kimi məcbur edə bilmərik ki, kollegiya ilə müqavilə imzalasın. Son təyinatda 9 vəkilimiz Prezident İlham Əliyevin imzaladığı sərəncamla hakim təyin edildi. Vəkil olandan sonra "əbədi vəkil qalmalısan" deyə qayda yoxdur. Hətta təqaüdə çıxan hakimlər də bizə müraciət ediblər, vəkil kimi fəaliyyətlərini davam etdirmək istəyirlər".

VK sədri əlavə edib ki, əvvəllər hüquq fakültəsində təhsil alanların az hissəsi vəkil olmaq istəyirdi. İndi bu durum dəyişib.

"Vəkillər Kollegiyası üçün yeni bina tikilir. Biz hətta binamızın tikintisinin gecikməsinə də razıyıq. Amma gənc hüquqşünaslara, vəkillərə dəstəyimizi ertələyə bilmərik", - o vurğulayıb.