Çin-Qırğızıstan-Özbəkistan marşrutu Azərbaycanı beynəlxalq dəmiryol layihəsində iştiraka cəlb edə blər.

"Report" xəbər verir ki, bunu jurnalistlərə açıqlamasında “Qırğızıstan Dəmir Yolları”nın baş direktoru Azamat Sakiyev bildirib.

"Qırğızıstanda həm Mərkəzi Asiya, həm də bütün dünya üçün əhəmiyyətli olan irimiqyaslı meqalayihə başlayıb. Söhbət Çin-Qırğızıstan-Özbəkistan marşrutundan gedir. Marşrut perspektivdə Türkmənistan, Azərbaycan, Türkiyə və daha sonra Avropaya gedən nəqliyyat dəhlizləri ilə inteqrasiya olunacaq. Ümumilikdə, marağı artırmaq, layihədə iştirak üçün biz bu marşrutu Azərbaycanda təşviq etməyi planlaşdırırıq", - o qeyd edib.

Onun sözlərinə görə, tikinti işlərinə artıq başlanılıb:

"Layihə çərçivəsində işlərin təxminən 2030-cu ilə qədər tamamlanmasını və yolu istifadəyə verməyi planlaşdırırıq. İlk mərhələdə ötürücülük qabiliyyəti təxminən 5 milyon ton, daha sonra isə ildə 15 milyon tona qədər olacaq. Marşrutun unikallığı onun sürətindədir - Çindən Avropaya yüklərin çatdırılması cəmi yeddi gün çəkəcək".

A.Sakiyev çevik tarif siyasətinin Çin, Özbəkistan və Türkmənistan dəmir yolları ilə sıx əməkdaşlıq sayəsində mühüm rəqabət üstünlüyünə çevriləcəyini vurğulayıb:

"Hazırda tarif mexanizmi hazırlayırıq. Bu isə marşrutu alternativ istiqamətlərlə müqayisədə daha sərfəli edəcək. Xüsusilə, artıq Kaşqardan (Çin) Qırğızıstanla sərhəddə yerləşən Toruqarta qədər hissənin tikintisi aparılır. Özbəkistanda infrastruktur artıq hazırdır, bizə 2030-cu ilə qədər tamamlanması planlaşdırılan Qırğızıstan hissəsini bitirmək qalıb".

O əlavə edib ki, yeni dəmir yolu konteyner və zəncirvari yük daşımaları üçün istifadə olunacaq. Bununla yanaşı, sərnişin daşımaları da planlaşdırılır. A.Sakiyev qeyd edib ki, son vaxtlar Avropaya kömür ixracı artıb, ona görə də marşrutda yarımvaqonlar və örtülü vaqonlar istifadə olunacaq.

Xatırladaq ki, Bişkekdə 2024-cü ilin sentyabrında birgə müəssisənin yaradılması elan edilib: səhmlərin 51 %-i Çinə, 24,5 %-i Qırğızıstana və 24,5 %-i Özbəkistana məxsusdur. Layihənin ümumi büdcəsi 4,7 milyard ABŞ dollarıdır.