Türkiyə üzərindən Azərbaycanın neft və qazı dünya bazarına, o cümlədən Avropaya çatdırılır.

Bu fikirləri “Report” İnformasiya Agentliyinin direktoru Fuad Hüseynəliyev Azərbaycan Prezidenti İlham Əliyevin Türkiyəyə dövlət səfərini, eləcə də Prezidentin türkiyəli həmkarı Rəcəb Tayyib Ərdoğanla İğdır-Naxçıvan qaz kəmərinin açılış mərasimində iştirakını şərh edərkən deyib.

Onun sözlərinə görə, əsas qaz marşrutu olan Cənub Qaz Dəhlizinin də Türkiyə ərazisindən keçərək Avropaya çatdırılması Azərbaycan-Türkiyə münasibətlərini daha da inkişaf etdirib:

“Bildiyiniz kimi, Trans-Anadolu Qaz Boru Kəməri (TANAP) və Trans-Adriatik Qaz Boru Kəməri (TAP) layihələrindən digər ölkələrin də istifadəsi ilə bağlı davamlı müzakirələr aparılır. Şübhəsiz, burada Avropa ilə əsas bağı Azərbaycan və Türkiyə yaradıb, bu da hər iki ölkənin önəmini göstərir”.

Fuad Hüseynəliyev Bakı-Tbilisi-Qars dəmiryolu xəttinin də əhəmiyyətinə diqqət çəkib: “Məhz bu yol vasitəsilə Türkiyə ərazisindən Avropaya çıxış təmin edilir, bununla da Çindən Avropaya qədər uzun bir marşrut yaranmış olur. Bütün bu iqtisadi layihələr regionda, o cümlədən Avropada, Çində, Qazaxıstanda yeni, geniş və əhatəli marşrutun yaranması deməkdir – bura yükdaşımaları da daxildir, neft və qaz da”.

Direktor bildirib ki, hazırda Qazaxıstan Bakı-Tbilisi-Ceyhan marşrutundan kifayət qədər istifadə edir və öz neftini bu xətt vasitəsilə dünya bazarına çıxarır:

“Bu da Rusiya-Ukrayna müharibəsi ilə bağlıdır. Bakı-Tbilisi-Ceyhan xətti daha təhlükəsiz marşrutdur. Yeri gəlmişkən, bizim yaratdığımız və Bakıdan başlayaraq Avropaya qədər uzanan qaz xəttindən Türkmənistanın istifadəsi barədə də uzun illərdir söhbət gedir. Sözsüz ki, bunun icrası üçün Türkmənistan ilkin addım atmalıdır, yalnız bundan sonra onların da qazı Avropaya rahat şəkildə çatdırıla bilər”.

“Report” İnformasiya Agentliyinin direktoru bütün bu layihələrin vaxtilə qoyulan investisiyalar və verilən qərarların bu gün üçün önəmini və Azərbaycanla Türkiyənin qardaşlıq siyasətinin nəticəsini göstərdiyini ifadə edib.