Azərbaycan və Qazaxıstan Transxəzər Beynəlxalq Nəqliyyat Marşrutu (Orta Dəhliz)üzrə əməkdaşlığın genişləndirilməsini müzakirə edib.

"MemurTv.az" xəbər verir ki, rəqəmsal inkişaf və nəqliyyat naziri Rəşad Nəbiyev bu barədə "X" sosial şəbəkə hesabında paylaşım edib.

Qazaxıstanın nəqliyyat naziri Nurlan Sauranbayev, "Samruk-Kazına" ASC-nin İdarə Heyətinin sədri Nurlan Jakupov və "Qazaxıstan Dəmir Yolları" ASC-nin İdarə Heyətinin sədri Eljas Otınşıyevlə görüş keçirdiyini bildirən nazir qeyd edib ki, görüşdə Transxəzər Beynəlxalq Nəqliyyat Marşrutu (Orta Dəhliz) üzrə əməkdaşlığın genişləndirilməsi, bərə gəmilərinə investisiya imkanları, avtomobil nəqliyyatı ilə yükdaşımalarının artırılması, həmçinin Xəzər dənizinin dibi ilə sualtı fiber-optik kabel xəttinin çəkilməsi layihəsi ilə bağlı məsələlər müzakirə olunub.

Tərəflər, eyni zamanda, Orta Dəhlizin inkişafına dair saziş layihəsi və marşrutun rəqəmsallaşdırılması istiqamətində görülən işlər ətrafında fikir mübadiləsi aparıblar.