Ermənistanda hər kəs anlamalıdır ki, Vaşinqton razılaşması şəxslər arasında yox, iki dövlət arasında imzalanan sənəddir - RƏY
Ermənistan hakimiyyəti regiondakı güc balansını gözardı edə bilməz.
Bunu "Report"a açıqlamasında Milli Məclisin üzvü Könül Nurullayeva deyib.
O bildirib ki, Prezident İlham Əliyev "Əl-Ərəbiyyə" telekanalına müsahibəsində bir çox vacib məqamlara toxunub:
"İlham Əliyev ilk növbədə Azərbaycan-Ermənistan münasibətlərinin normallaşması ilə bağlı rəsmi İrəvanın öhdəliklərini xatırladıb. Bildirib ki, Ermənistan razılaşmanı pozarsa, bu ölkə ciddi çətinliklərlə üzləşəcək. Ermənistan mütləq bölgədəki güc balansı haqqında düşünməli, Azərbaycana qarşı heç bir halda ərazi bütövlüyü iddiası ilə çıxış etməməlidir. Yəni, Ermənistanda hər kəs anlamalıdır ki, Vaşinqton razılaşması şəxslər arasında yox, iki dövlət arasında imzalanan sənəddir. Ona görə məsələyə ciddi yanaşılmalıdır. Ermənistan İlham Əliyevin bu xəbərdarlığından nəticə çıxarmalıdır".Deputat Azərbaycan Prezidentinin atdığı bütün addımlarda və aldığı qərarlarda hər zaman dövlətin milli maraqlarını nəzərə aldığını qeyd edib:
"Müsahibədə İlham Əliyev bir daha bəyan etdi ki, Vaşinqton razılaşması Azərbaycanın milli maraqlarına tam cavab verır. Bu, sözügedən razılaşma ətrafında mənfi rəy yaratmaq istəyən daxildəki bəzi qərəzli dairələrin iddialarının həqiqəti əks etdirməyini təsdiqləyir. Bir daha aydın olur ki, bəzi qüvvələr Azərbaycanın uğurlarını həzm edə bilmir".
K.Nurullayeva deyib ki, münaqişənin 30 ilə yaxın müddətə uzanmasının səbəbi də Azərbaycanın heç vaxt təslimçi sülhlə barışmaması olub:
"Bu baxımdan dövlətçilik maraqlarını öz korporotiv maraqlarından üstün tutan qüvvələrin Azərbaycanla Ermənistan arasında paraflanmış sənəd ətrafında şou yaratmaq cəhdləri iflasa uğrayır. Azərbaycan Prezidenti Zəngəzur dəhlizi -TRİPP marşrutu ilə bağlı məsələyə də aydınlıq gətirdi. Bildirdi ki, əslində 5 il ərzində dəhlizin işə düşməsi mümkün ola bilərdi, lakin Ermənistanın məsələni yubatması ABŞ Prezidenti Donald Trampın və onun komandasının prosesə qoşulmasına zəmin yaratdı. Beləliklə, layihə beynəlxalq təhlükəsizlik zəmanətləri əsasında reallaşacaq. Bu da Azərbaycanın maraqlarına tam cavab verir".
