Bu ilin iyul ayında Azərbaycan-Vyetnam Hökumətlərarası Komissiyanın 3-cü iclası, habelə biznes forumun keçirilməsi razılaşdırılıb.

Bu barədə “Report”a Energetika Nazirliyindən məlumat verilib.

Bildirilib ki, bu barədə razılıq Azərbaycan-Vyetnam Hökumətlərarası Komissiyanın həmsədrləri, energetika naziri Pərviz Şahbazov ilə Vyetnamın sənaye və ticarət naziri Nguyen Hong Dien arasında onlayn formatda keçirilən görüşdə əldə edilib.

Görüşdə Vyetnam Kommunist Partiyası Mərkəzi Komitəsinin Baş katibi To Lamın ölkəmizə səfəri zamanı Azərbaycan və Vyetnam arasında qəbul edilmiş Strateji Tərəfdaşlıq haqqında Birgə Bəyanat və imzalanmış sənədlərin münasibətlərin inkişafında mühüm rolu qeyd olunub. Həmçinin Baş katibi To Lamın Hanoy şəhərində Azərbaycanın Müstəqillik Gününə həsr olunmuş rəsmi qəbulda iştirakı dostluq münasibətlərinin göstəricisi kimi dəyərləndirilib.

Strateji tərəfdaşlıq səviyyəsinə yüksələn ikitərəfli əlaqələrin yeni istiqamətlər üzrə genişlənməsi, ticari-iqtisadi və enerji sahəsində əməkdaşlığın inkişafı üçün potensial imkanlar nəzərdən keçirilib. Bildirilib ki, Azərbaycan zəngin enerji ehtiyatlarına sahib olaraq regional enerji mərkəzi kimi fəaliyyət göstərir, Vyetnam isə elektrik enerjisi sahəsində sürətlə inkişaf edir və yaşıl keçidə yönəlir. Hər iki ölkə yeni texnologiyalar, bərpa olunan enerji və hidrogen sahəsində əməkdaşlıq perspektivlərinə malikdir. Həmçinin infrastruktur və logistika, kadr hazırlığı və təcrübə mübadiləsi üzrə əməkdaşlığın genişləndirilməsi niyyəti ifadə olunub.

Həmçinin, ikitərəfli münasibətlərin yeni əməkdaşlıq sahələri ilə möhkəmlənməsində Hökumətlərarası Komissiyanın mühüm rolu vurğulanıb. Komissiyanın iclasının ticarət, investisiya, enerji, kənd təsərrüfatı, nəqliyyat, mədəniyyət və digər sahələr üzrə əməkdaşlığı əks etdirən gündəliyi və digər hazırlıq məsələlərinə dair fikir mübadiləsi aparılıb.