Sosial Tədqiqatlar Mərkəzinin (STM) nümayəndələri Azərbaycan Həmkarlar İttifaqları Konfederasiyasında (AHİK) olublar.

Konfederasiya sədri Sahib Məmmədov ölkəmizdə həmkarlar ittifaqlarının səmərəli fəaliyyəti üçün yaradılan əlverişli şəraiti və cənab Prezident İlham Əliyevin bu sahəyə diqqət və qayğısını vurğulayıb, ittifaq üzvlərinin əmək, sosial, iqtisadi hüquqlarının müdafiəsi, sağlamlığının qorunması, müalicə və istirahətinin təşkili istiqamətində görülən işlərdən danışıb.

Görüşdə həmkarlar ittifaqları sistemində aparılan islahatlar, tətbiq edilən yeniliklər, “AHİK Könüllüləri”, “Layiqli Əmək Səfirləri”, “Həmkardan həmkara qayğı ilə”, "AHİK Plus" layihələri və “Kurort” Turizm İnformasiya Mərkəzinin fəaliyyəti barədə ətraflı məlumat verilib.

Sonra AHİK-in fəaliyyəti, eləcə də “Layiqli Əmək Səfirləri”, “Həmkardan həmkara qayğı ilə” layihələrindən bəhs edən videomateriallar nümayiş olunub.

Milli Məclisin İnsan hüquqları komitəsinin sədri, STM-nin İdarə Heyətinin sədri Zahid Oruc Konfederasiyanın həyata keçirdiyi islahatları və yenilikləri yüksək dəyərləndirib, əmək münasibətlərinin tənzimlənməsi, ölkəmizdə vətəndaş cəmiyyətinin inkişafında həmkarlar ittifaqlarının rolunu qeyd edib.

Mərkəzin fəaliyyəti və hədəfləri barədə danışan Z.Oruc iki qurum arasında əlaqələrin qurulması və inkişafının əhəmiyyətini vurğulayıb.

Görüşdə AHİK və STM arasında əməkdaşlıq haqqında Memorandum imzalanıb.

Sonra STM-nin nümayəndələri AHİK-də vətəndaşların qəbulu üçün yaradılmış şəraitlə, “Kurort” Turizm İnformasiya Mərkəzində yollayışların verilməsi prosesində tətbiq edilən yeniliklərlə, eləcə də yeni yaradılmış Əməyin Mühafizəsi və Hüquqi Yardım Mərkəzi ilə tanış olublar.