Biz gələcəkdə yaradılacaq Tibb və Sağlamlıq Elmləri Fakültəsi vasitəsilə yalnız peşəkar deyil, eyni zamanda innovativ düşüncəli, şəfqətli və etik dəyərlərə malik olan səhiyyə mütəxəssisləri yetişdirməyi qarşıya məqsəd qoymuşuq.

"Report"un Qarabağa ezam olunmuş əməkdaşı xəbər verir ki, bunu Qarabağ Universiteti Klinikasının Baş direktoru Samir Babayev “Qarabağda gələcəyin tibb bacısı və həkim təhsili modeli” mövzusunda keçirilən beynəlxalq konfrans çərçivəsində jurnalistlərə açıqlamasında deyib.

Onun sözlərinə görə, klinikanın təsis olunması Qarabağ bölgəsində səhiyyə xidmətlərinin inkişafında əlamətdar rol oynayacaq və regionda mövcud səhiyyə boşluqlarının aradan qaldırılmasına əhəmiyyətli töhfələr verəcək: "Qarabağ Universiteti Klinikası və gələcək fakültəmizi beynəlxalq standartlara cavab verən, bölgədə və dünyada tanınan bir tibbi təhsil və innovasiya mərkəzinə çevirməyi hədəfləyirik".

S.Babayev tibb fakültəsində planlaşdırılan əsas proqramlar barədə də məlumat verib: "6 illik Tibb (MD) və 4 illik Tibb Bacısı (BSN) təhsili bu il başlanır. Xəstəyə qulluqda mütəxəssisləşmiş, eyni zamanda araşdırma və liderlik bacarıqlarına malik tibb bacıları yetişdirməyi hədəfləyirik. Diş həkimliyi və başqa proqramlar üzrə də yaxın illərdə tələbələri qəbul etməyə başlamaq istəyirik".

Direktor qeyd edib ki, rezidentura və magistr səviyyəsində də müxtəlif ixtisaslaşma imkanları, o cümlədən İctimai Səhiyyə üzrə Magistr (MPH) təklif olunacaq.

"Seçmə fənn olaraq incəsənət proqramını nəzərə almaq özünüifadə, qrup halında əməkdaşlıq və ünsiyyət bacarıqlarının inkişafı baxımından mühüm əhəmiyyət daşıyır. İncəsənət tələbələrə əsas fənlərdə əldə edə bilməyəcəkləri bacarıqları inkişaf etdirmək imkanı yaradır. Fakültəmizdə ənənəvi öyrənmə metodları ilə kifayətlənmirik. Bunun əvəzinə, kompetensiyaya əsaslanan tibb təhsili tətbiq edirik ki, tələbələr biliklərini praktik vərdişlərə çevirə bilsinlər. İnteqrəolunmuş və fənlərarası təhsil modelindən istifadə edirik", - deyə S.Babayev vurğulayıb.

Direktor onu da əlavə edib ki, tədris proqramlarının effektiv idarə edilməsi və davamlı təkmilləşdirilməsi üçün Məsləhət Şurasının təsis edilməsi planlaşdırılır.