Azərbaycan böyük həcmdə təbii qaz ehtiyatlarına malikdir və daha geniş regional miqyasda enerji təhlükəsizliyinin gücləndirilməsi üçün tədarükü artırmağa hazırdır.

“Report” xəbər verir ki, bunu Azərbaycanın energetika nazirinin müavini Orxan Zeynalov "Daha "yaşıl" gələcəyə innovativ yollar: bərpa olunan enerji mənbələri və emissiyaların azaldılması" mövzusuna həsr olunmuş tədbirdə bildirib.

Onun sözlərinə görə, Azərbaycan ənənəvi enerji resurslarının Avropa və dünya bazarlarına strateji tədarükçüsü olaraq qalır.

"Son dörd ildə biz Avropanın enerji sisteminə dəstəyimizi gücləndirmişik və töhfə verməyə davam edirik. İxrac tədarükünün daha da genişləndirilməsi üçün iki əsas şərt lazımdır: birincisi, beynəlxalq maliyyə institutların tərəfindən maliyyələşdirilmə və dəstək; ikincisi, uzunmüddətli sazişlər və alıcılar və tərəfdaşların zəmanətləri. Bu amillər, eləcə də etibarlı prosedur mexanizmləri olduqca önəmlidir. Azərbaycan böyük həcmdə qaz ehtiyatlarına malikdir və daha geniş regional kontekstdə enerji təhlükəsizliyinin gücləndirilməsinə töhfə vermək üçün tədarükü artırmağa hazırdır", - O.Zeynalov qeyd edib.

O, eyni zamanda ölkənin "yaşıl enerji" layihələrinə fəal şəkildə sərmayə qoyduğunu vurğulayıb:

"Bu layihələr iqtisadiyyatın və enerji balansının şaxələndirilməsinə töhfə verməklə yanaşı, həm də böyük iqtisadi fayda gətirir. Birincisi, bərpa olunan enerji mənbələrinin (BOEM) inkişafı iqlim dəyişikliklərinə qarşı dayanıqlılığı gücləndirir. İkincisi, bu, əvvəllər elektrik stansiyalarında istifadə olunan əlavə qaz həcmlərini yönəltməyə imkan verir. 2027-ci ilə qədər biz bərpa olunan enerji mənbələri sahəsində 10 layihə həyata keçirməyi planlaşdırırıq ki, bu da müəyyən edilmiş gücün təxminən 2 giqavatını və 2,7 milyard ABŞ dolları məbləğində investisiyanın cəlb edilməsini təmin edəcək".

O.Zeynalov əlavə edib ki, ölkə artıq inkişafın ikinci mərhələsinə keçib və bu çərçivədə təxminən 5 milyard kubmetr qazın cəlb edilməsi planlaşdırılır. Onun sözlərinə görə, 2030-cu ilə qədər BOEM çərçivəsində istehsal olunan enerjinin 65 %-nin ixrac edilməsi, 2027-ci ilə qədər isə dörd əsas strateji dəhliz üzrə növbəti addımların reallaşdırılması planlaşdırılır.