ABŞ Prezidenti Donald Tramp Rusiya lideri Vladimir Putinlə telefon danışığını çox məhsuldar adlandırıb.

“Report” xəbər verir ki, bu barədə Tramp “Truth Social”da müvafiq paylaşım dərc edib.

“Rusiya Prezidenti Putinlə bugünkü telefon danışığım çox yaxşı və məhsuldar oldu”, – o yazıb.

Tramp həmçinin bildirib ki, o, Putinlə Rusiya – Ukrayna münaqişəsinin həlli ilə bağlı sazişlərin müddəalarını müzakirə edib.

“Sülh sazişinin bir çox elementləri, o cümlədən minlərlə əsgərin həlak olması və həm prezident Putin, həm də prezident Volodimir Zelenski bunun dayandırılmasını istəməsi müzakirə olunub”, – ABŞ prezidenti yazıb.

Söhbətin ardınca Tramp vurğulayıb ki, tam atəşkəs rejiminin tətbiqi üzrə işlər indi sürətləndiriləcək: “Proses artıq tam qüvvədədir. Ümid edirik, bəşəriyyət naminə bu işi görəcəyik. Biz Rusiya və Ukrayna arasındakı bu dəhşətli müharibənin yekunda dayandırılması və nəticədə tam atəşkəsə doğru sürətlə işləyəcəyimiz anlayışı ilə bütün enerji və infrastruktur obyektləri üzrə dərhal atəşkəs barədə razılığa gəldik”, – o qeyd edib.