Afrika İttifaqı İnkişaf Agentliyinin (NEPAD) Kommunikasiya və təbliğat şöbəsinin rəhbəri Zippora Mobane III Şuşa Qlobal Media Forumunu Azərbaycanın mədəniyyət, tarix və açıq dialoq vasitəsilə öz dayanıqlılığını, dəyərlərini və inkişafa can atmasını nümayiş etdirə bilməsinin bariz nümunəsi adlandırıb.

“Report” xəbər verir ki, o, bu barədə Cənubi Afrika Respublikasının (CAR) “Jambo Africa” nəşrinə bildirib.

Mobanenin sözlərinə görə, onun Azərbaycanla tanışlığı 2024-cü ildə, BMT-nin iqlim dəyişikliyi konfransında - COP29-da iştirak etmək üçün ilk dəfə Bakıya səfəri ilə başlayıb. Artıq o zaman yüksək səviyyəli təşkilatçılıq onda böyük təəssürat yaratmışdı, Şuşada keçirilən mediaforumda (19-21 iyul) iştirak isə ölkəni, onun xalqını və mədəni irsini daha dərindən anlamağa imkan verdi."Şuşa mediaforumu sadəcə mütəxəssislər üçün peşəkar platforma deyil, müasir texnologiyaları, məzmunlu müzakirələri və zəngin mədəni proqramı birləşdirən genişmiqyaslı hadisə idi. Təşkilatçılar qüsursuz logistikanı təmin etdilər və elə bir atmosfer yaratdılar ki, iştirakçılar təkcə qlobal medianın aktual çağırışlarını müzakirə etməklə yanaşı, həm də Azərbaycanın tarixi və mədəni mühitinə qərq olmaq imkanı əldə etdilər", - o bildirib.

"Tarixi abidələrin, ənənələrin və müasir medianın əl-ələ verərək dialoq və qarşılıqlı anlaşma üçün unikal məkan yaratdığını müşahidə etmək heyrətamiz idi", - NEPAD nümayəndəsi əlavə edib.

Mobane forum çərçivəsində media savadlılığı və informasiya təhlükəsizliyinə həsr olunmuş müzakirələri xüsusi vurğulayıb. O qeyd edib ki, dezinformasiyanın yayılması problemi yalnız media çərçivəsindən kənara çıxır və hökumətlərin, özəl sektorun və texnoloji platformaların birgə səy göstərməsini tələb edir.

Azərbaycan Prezidenti İlham Əliyevin forumun işində birbaşa iştirakı da onda xoş təəssürat yaradıb.

"Prezident jurnalistlərlə açıq və səmimi dialoqa hazırlıq nümayiş etdirdi - heç bir sual cavabsız qalmadı. Bu, liderlərdə nadir rast gəlinən cəhətdir. Onun şəffaflığı və çətin mövzuları müzakirə etməyə hazır olması müdrik və məsuliyyətli liderlikdən xəbər verir", - o qeyd edib.

Bundan əlavə, Mobane İlham Əliyevin Qarabağın bərpasındakı strateji rolunu vurğulayaraq, onu təkcə siyasi lider deyil, həm də milli birlik və dirçəliş rəmzi adlandırıb.

"Onun regionun bərpası proseslərini şəxsi nəzarətdə saxlaması, mədəni irsin qorunmasına göstərdiyi diqqət və insanların emosional və sosial dirçəlişini təmin etmək istəyi əsl rəhbərlik nümunəsidir. Bu, Afrika ölkələri də daxil olmaqla bir çox ölkələr üçün ilham mənbəyidir", - nümayəndə bildirib.O qeyd edib ki, Şuşa mediaforumu sadəcə fikir mübadiləsi üçün platforma deyil, dərin anlayışa və beynəlxalq əlaqələrin möhkəmlənməsinə töhfə verən əsl mədəni diplomatiya hadisəsidir.

"Azərbaycan göstərdi ki, ölkənin uğurla brendləşdirilməsi sadəcə marketinq və parlaq obrazlar deyil, dünyanın onun unikal kimliyini və dəyərlərini həqiqətən anlamasına imkan verən canlı dialoq yaratmaqdır", - Mobane vurğulayıb.

NEPAD nümayəndəsi əlavə edib ki, Azərbaycanın forumda nümayiş etdirilən təcrübəsi inkişafa, dirçəlişə və səmərəli beynəlxalq qarşılıqlı fəaliyyətə can atan digər ölkələr üçün ilham mənbəyi və örnək ola bilər.