Kiçik və orta biznes üçün logistik dəstək mexanizmi kimi yeni alətləri təşviq etmək lazımdır.

"Report"un Şuşaya ezam olunan müxbiri xəbər verir ki, bunu İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev 6-cı İqtisadi Əməkdaşlıq Təşkilatı (ECO) biznes forumunda bildirib.

Onun sözlərinə görə, ECO regionunda əməkdaşlığı şaxələndirmək üçün bir neçə əsas istiqamətə diqqət yetirmək lazımdır: "Birincisi, ticarət əlaqələrini ECO regionunda cəmləşdirmək lazımdır. Bu ilin yanvar ayına olan məlumata görə, Azərbaycanın ECO-ya üzv ölkələrinə ixracı 1,5 milyard ABŞ dollarını keçib. Artım üçün hələ də əhəmiyyətli imkanlar var. Bu, əlavə dəyərli istehsala diqqət yetirmək, maneələri aradan qaldırmaq və daha dayanıqlı təchizat zəncirləri qurmaq deməkdir".

O qeyd edib ki, xüsusilə bərpa olunan enerji, rəqəmsal texnologiyalar, infrastruktur və aqrobiznes sahələrində dayanıqlı sərhədlərarası investisiyaları artırmaq lazımdır: "Bundan başqa, kiçik və orta biznesin dəstəklənməsi inklüziv inkişaf üçün açardır. Biz KOB-larımıza yeni bazarlara çıxmağa və rəqəmsal alətləri mənimsəməyə kömək etməliyik. Məsələn, gəlin, ixracatçılarımızı dəstəkləmək üçün logistik dəstək mexanizmi kimi yeni alətləri təşviq edək".