Azərbaycan və Rumıniya arasında ikitərəfli münasibətlərdə enerji sahəsi strateji əhəmiyyət kəsb edir.

“Report” xəbər verir ki, bunu Rumıniya Energetika Nazirliyinin Dövlət katibi Pavel-Kasian Nitulesku Bakıda keçirilən 30-cu Yubiley Beynəlxalq Xəzər Neft və Qaz sərgisi və 13-cü Xəzər Beynəlxalq Energetika və Yaşıl Enerji beynəlxalq sərgisi çərçivəsində “Dayanıqlı və davamlı enerji gələcəyi naminə qlobal əməkdaşlıq” panel müzakirəsində bildirib.

Onun sözlərinə görə, Azərbaycan və Rumıniya arasında uzunmüddətli ikitərəfli münasibətlər mövcuddur və enerji sahəsi bu dialoqun strateji komponentidir:
“Birgə səylərimiz ölkələrimizin enerji təhlükəsizliyini gücləndirmək öhdəliyinə əsaslanır. Bu səbəbdən, çətinliklərə baxmayaraq, regional əməkdaşlıq vasitəsilə inanılmaz tərəqqinin əldə edildiyinə qətiyyətlə inanıram. Ölkələrimiz arasındakı münasibətin əsasında duran bu əsas prinsip, iştirak etdiyimiz regional infrastruktur layihələrində aydın şəkildə əks olunur”, - P. Nitulesku bildirib.

Dövlət katibi qeyd edib ki, Avropanın enerji təhlükəsizliyinin təmin edilməsi üçün uyğun infrastruktur və davamlı investisiyalar zəruridir: “Bu məqsədlə biz enerji təhlükəsizliyini yaxşılaşdırmaq, elektrik enerjisi və təbii qazın sərbəst axınını asanlaşdırmaq və bərpa olunan enerji inteqrasiyasını təkmilləşdirmək məqsədi daşıyan mühüm elementlər kimi sərhədlərarası elektrik və qaz bağlantılarının inkişafını dəstəklədik. Rumıniya təchizat mənbələrinin şaxələndirilməsi və alternativ nəqliyyat marşrutlarının yaradılması istiqamətində ardıcıl olaraq çalışır”, - deyə o vurğulayıb.

Pavel-Kasian Nitulesku bildirib ki, Rumıniya bu istiqamətdə bir sıra regional təşəbbüslərdə fəal iştirak edir: “Şaquli Dəhliz layihəsi bu baxımdan önəmlidir. Bu təşəbbüs Yunanıstan, Bolqarıstan, Macarıstan, Moldova və Ukrayna kimi tərəfdaş ölkələrlə birlikdə Mərkəzi və Şərqi Avropa regionunun yeni enerji təchizatı imkanlarına çıxışını təmin edə bilər. Hazırda Rumıniya Qara dənizi ölkənin qərb sərhədinə birləşdirəcək, 5000 meqavat gücündə yüksək gərginlikli birbaşa cərəyan ötürücü xətti üzərində çalışır. Bundan əlavə, Azərbaycan, Gürcüstan və Macarıstanla birgə bu bağlantını Qara dənizdə sualtı kabel vasitəsilə genişləndirməyi planlaşdırırıq. Bu çərçivədə Gürcüstan və Azərbaycanla əməkdaşlığımız "Yaşıl Dəhliz" adlı layihədə reallaşacaq”.