Abşeron rayonunda müşahidə olunan intensiv yağıntılar bir sıra yaşayış məntəqələrində ciddi fəsadlara yol açıb.

Denmedia.az xəbər verir ki, xüsusilə Hökməli və Qobu qəsəbələri sel sularının təsirindən zərər görən əsas ərazilər sırasında yer alır.

Hökməli kəndində vəziyyət daha da ağırdır. Yağan leysan yağışları nəticəsində avtomobil yolları keçilməz hala düşüb, bəzi fərdi yaşayış evlərini isə sel suları basıb. Sakinlər evlərində köməksiz vəziyyətdə qaldıqlarını bildirir, bir çox hallarda isə evdən çıxışın mümkün olmadığını qeyd edirlər.

Ərazidə yağış sularının yığılması nəticəsində infrastruktur yüklənib, xüsusilə su daşıyıcı xətlərin normadan artıq yüklənməsi suyun vaxtında təxliyyəsini çətinləşdirib. Sakinlər hazırda aidiyyatı qurumlardan kömək istəyir.

Məsələ ilə bağlı Abşeron Su Meliorasiya Sistemlərinin İstismarı İdarəsindən bildirilib ki, yaranmış vəziyyətlə əlaqədar qəza briqadaları gücləndirilmiş iş rejiminə cəlb olunub. Hazırda ərazilərdə suyun çəkilməsi və fəsadların aradan qaldırılması istiqamətində operativ tədbirlər davam etdirilir. Qurum rəsmiləri qeyd edir ki, intensiv yağıntılar səbəbindən yaranan problemlərin qısa müddətdə aradan qaldırılması üçün bütün texniki imkanlar səfərbər olunub. Bununla yanaşı, sakinlərə ehtiyatlı olmaları və zəruri hallarda aidiyyəti qurumlara müraciət etmələri tövsiyə olunur. Hazırda ərazilərdə vəziyyət nəzarətdə saxlanılır, lakin yağışların davam etməsi əlavə çətinliklər yarada bilər.