ABŞ və İordaniya bu gün uzunmüddətli ticarət maneələrini aradan qaldıracaq və Amerika ixracatçıları üçün imkanları genişləndirəcək qarşılıqlı ticarət haqqında saziş bağlayıb.

"MemurTv.az" xəbər verir ki, bu barədə Ağ Evin saytında dərc olunan sənəddə deyilir.

"Saziş üçüncü ölkələrin qeyri-bazar siyasətinə qarşı birgə mübarizə, habelə investisiya təhlükəsizliyi, ixrac nəzarəti və rüsumları ödəməkdən yayınma sahəsində əməkdaşlıq öhdəlikləri vasitəsilə sülhün möhkəmləndirilməsi, regional əməkdaşlığın genişləndirilməsi, təchizat zəncirlərinin və innovasiyaların dayanıqlığının artırılması üzrə öhdəlikləri möhkəmləndirəcək", - məlumatda qeyd olunub.

Bugünkü açıqlama regionda sülh, rifah və investisiya gələcəyini qurmağa kömək edəcək, eyni zamanda Amerika istehsalçılarının, fermerlərinin, maldarlarının və digər əmtəə istehsalçılarının maraqları naminə İordaniya tərəfindən tarixi öhdəlikləri təmin edəcək.

Sazişin əsas şərtlərinə Amerika malları üçün İordaniya bazarına rüsumsuz çıxış, təbiəti mühafizə qanunvericiliyinə əməl olunması, əmək hüquqlarının qorunması, əqli mülkiyyətin mühafizəsinin gücləndirilməsi, ədalətli ticarət təcrübəsinin təmin edilməsi və gömrük prosedurlarının təkmilləşdirilməsi daxildir.

İordaniya həmçinin qeyri-tarif ticarət maneələrini aradan qaldıracaq və ABŞ-nin kənd təsərrüfatı məhsulları və Amerika istehsalı olan avtomobillər də daxil olmaqla, Amerika malları üçün bazara çıxışı genişləndirəcək.

İkitərəfli razılaşmalar çərçivəsində "Royal Jordanian Airlines" aviaşirkəti 1,4 milyard dollar dəyərində altı "Boeing 787-9" təyyarəsi, həmçinin 500 milyon dollar dəyərində əlavə hava gəmiləri alacaq, "Hikma Pharmaceuticals" isə ABŞ-yə 1 milyard dollar investisiya yatıracaq. İordaniya şirkətləri həmçinin hər il ABŞ-dən 300 milyon dollardan çox məbləğdə xammal almağa razılaşıb.