Tərtər Rayon İcra Hakimiyyətinin başçısı Müstəqim Məmmədov “Kapital Bank”-ın rayon filialına yeni təyin edilmiş müdiri İlkin Mehtiyevi qəbul edib.

Modern.az xəbər verir ki, qəbul zamanı rayon əhalisinə göstərilən bank xidmətlərinin keyfiyyətinin artırılması, müasir maliyyə xidmətlərinin əlçatanlığının genişləndirilməsi və sahibkarlıq subyektlərinə göstərilən dəstək məsələləri müzakirə olunub.

Rayon rəhbəri bank sektorunun iqtisadi inkişafda mühüm rol oynadığını vurğulayaraq, xüsusilə kiçik və orta sahibkarlığın maliyyələşdirilməsi, nağdsız ödənişlərin təşviqi və innovativ bank məhsullarının tətbiqinin əhəmiyyətini qeyd edib. Bildirilib ki, rayon əhalisinin bank xidmətlərindən rahat və səmərəli istifadə etməsi üçün filialın fəaliyyətinin daha da təkmilləşdirilməsi vacibdir.

Filial müdiri öz növbəsində rəhbərlik etdiyi qurumun fəaliyyəti barədə ətraflı məlumat verərək, son dövrlərdə həyata keçirilən yeniliklər, kredit portfelinin genişləndirilməsi, rəqəmsal xidmətlərin inkişafı və müştəri məmnuniyyətinin artırılması istiqamətində görülən işlərdən danışıb. O, gələcəkdə də rayon əhalisinə daha keyfiyyətli və operativ xidmət göstərilməsi üçün səylərin davam etdiriləcəyini bildirib.

Görüşdə qarşılıqlı əməkdaşlığın genişləndirilməsi, əhalinin maliyyə savadlılığının artırılması və yeni layihələrin həyata keçirilməsi ilə bağlı fikir mübadiləsi aparılıb.

Qeyd edək ki, icra başçısının bu görüşü sosial mediada tənqidlərə səbəb olub.