Vətən müharibəsi şəhidi Vahid Ağayevin hər iki valideyni - atası Məcnun Ağayev və anası Gülnaz Ağayeva Bakıda yaşadıqları evdə dəm qazından zəhərlənərək ölüblər.

“Report”un xəbərinə görə, bu barədə Vətən müharibəsi şəhidi, mayor Vüsal Vəliyevin qardaşı Elyar İslamoğlu məlumat yayıb.

O bildirib ki, hadisə dünən axşam Sabunçu rayonunun Maştağa qəsəbəsində qeydə alınıb.

Qeyd edək ki, V.Ağayev 1996-cı ilin sentyabrın 14-də Bakı şəhəri, Maştağa qəsəbəsində anadan olub. 2020-ci ilin sentyabrın 29-da Vətən müharibəsində iştirak etmək üçün cəbhəyə yollanıb. O, Xocavənd, Füzuli, Cəbrayıl və Şuşa uğrunda döyüşlərdə iştirak edib. V.Ağayev 2020-ci il noyabrın 11-də Şuşada şəhid olub, Maştağadakı Şəhidlər xiyabanında dəfn edilib.

O, “Vətən uğrunda”, “Füzulinin azad olunmasına görə”, “Xocavəndin azad olunmasına görə”, "Şuşanın azad olunmasına görə" medalları ilə təltif olunub.

V.Ağayev subay idi. Onun ailəsindən yalnız sağlamlıq imkanları məhdud olan qardaşı sağ qalıb.