Məntəqədə seçicilərin sərbəst səs vermələri üçün bütün şərait yaradılıb.

Bunu “Report”un Yuxarı Şirvan bürosuna açıqlamasında 62 saylı Kürdəmir seçki dairəsinin 1 saylı seçki məntəqəsinin sədri Vüqar Nəsirov deyib.

Onun sözlərinə görə, məntəqədə səsvermə prosesi normal qaydada davam edir:

“Məntəqə üzrə 815-i kişi, 638-i qadın olmaqla, 1453 seçici qeydiyyatdadır. Eyni zamanda, məntəqədə 8 nəfər ilk dəfə səsvermə hüququndan istifadə edəcək. Yaşı 80-dən yuxarı olan seçicilərin sayı 3 nəfərdir.

Məntəqə bütün texniki avadanlıqlarla təmin olunub, müşahidə kameraları quraşdırılıb, seçicilərin sərbəst səs vermələri üçün bütün şərait yaradılıb.

Səsvermə başlayandan etibarən, hər hansı bir qayda pozuntusu qeydə alınmayıb və ümid edirik ki, bu tendensiya günün sonuna qədər davam edəcək”.

Qeyd edək ki, səsvermə saat 19:00-a qədər davam edəcək.

Seçkilər ölkə ərazisindəki 118 seçki dairəsini əhatə edən 5 min 846 məntəqədə keçirilir. 685 bələdiyyənin 8 min 71 üzvü üçün 16 min 92 namizəd mübarizə aparır.

Mərkəzi Seçki Komissiyasının (MSK) məlumatına əsasən, bələdiyyə seçkilərində səsvermə hüququ olan 5 milyon 961 min 987 seçici var.