Xəzər dənizinin Azərbaycan sektorunda yerləşən “Şahdəniz” yatağında üfüqi qazmanın tətbiqi səth müdaxiləsini azaltmağa, laydan qaz hasilatı əmsalını artırmağa və əməliyyat təhlükəsizliyini yaxşılaşdırmağa imkan verib.

“Report” xəbər verir ki, bunu Azərbaycan Dövlət Neft Şirkətinin törəmə müəsisəsi olan “SOCAR Upstream Operations Management International” şirkətinin HSE prosesləri və prosedurları şöbəsinin rəhbəri Hafiz Mirzağayev Bakıda keçirilən “IADC Drilling Caspian 2025” konfransında deyib.

Onun sözlərinə görə, “Şahdəniz” dünyanın ən böyük dəniz qaz yataqlarından biridir, lakin onun işlənməsi bir sıra çətinliklərlə müşayiət olunur: "Bunlara Xəzər dənizinin nadir flora və fauna növlərini əhatə edən həssas ekosistemi, şelfdəki mürəkkəb iş şəraiti, qaz hasilatının yüksək maya dəyəri və ciddi ekoloji tələblər daxildir.

H.Mirzağayev vurğulayıb ki, üfüqi qazma texnologiyasının tətbiqi bir dəniz platformasından bir neçə quyu qazmağa imkan verib. Bu yanaşma əlavə obyektlərin tikintisi zərurətini azaltdığından dəniz mühitinə təsiri minimuma endirib.

O əlavə edib ki, təhlükəsizlik və səmərəliliyin artırılması üçün real vaxt rejimində monitorinqi təmin edən IoT sensorları və qabaqcıl qazma alətlərindən geniş istifadə olunub.

“Əsas nəticələr arasında şaquli qazma ilə müqayisədə səth müdaxiləsinin 40 % azalması, laylarla təmasın optimallaşdırılması hesabına qaz hasilatı səviyyəsinin artması və sistemlərin proqnoz monitorinqi vasitəsilə əməliyyat təhlükəsizliyinin yaxşılaşdırılması var”, - deyə H. Mirzağayev bildirib.

Qeyd edək ki, “Şahdəniz” yatağında qaz hasilatına 2006-cı ilin dekabrında başlanılıb. Hazırda yataqda qaz və kondensat hasilatı “Mərhələ-1” çərçivəsində "Shah Deniz Alpha" platformasından, “Mərhələ-2” çərçivəsində isə "Shah Deniz Bravo" platformasından həyata keçirilir.