İsrailin hərbi hücumlarına və ABŞ-nin nüvə obyektlərinə zərbələrinə baxmayaraq, İran hələ də zənginləşdirilmiş uran ehtiyatlarına malikdir.

"Report" xəbər verir ki, bu barədə "The Nyu York Times" qəzeti İsrailin yüksək vəzifəli məmuruna istinadən yazır.

Onun sözlərinə görə, Fordo və Natanzadakı zənginləşdirilmiş uran ehtiyatları toxunulmaz qala bilər. Eyni zamanda, ABŞ və İsrail qeyd olunan nüvə obyektlərindəki bütün sentrifuqaları sıradan çıxara və ya zədələyə bildiklərini qiymətləndirməkdə razılaşırlar. Bundan əlavə, nəşr qeyd edib ki, Tehranın onları iş vəziyyətinə qaytarmağa çalışacağı ehtimalı azdır.

Qəzet qeyd edib ki, İran bir çox nüvə proqramını bir yerdə cəmləşdirmək əvəzinə siyasətlərini dəyişdirə və nüvə proqramını ölkədəki kiçik müəssisələrə paylamağa başlaya bilər. İran dəfələrlə bəyan edib ki, nüvə silahı yaratmağa can atmır. AEBA-nın baş direktoru Rafael Qrossi Polşanın “Rzeczpospolita” qəzetinə müsahibəsində bildirib ki, agentlik Tehranın nüvə silahına hazırlıq əlamətlərini qeydə almayıb.