BMT-nin Liviyadakı Dəstək Missiyası (UNSMIL) və ölkənin qərbində silahlı qüvvələrin baş komandanı kimi fəaliyyət göstərən Prezident Şurası paytaxtda atəşkəs rejimini qorumaq üçün atəşkəs komitəsi yaradıb.

"Report"un xəbərinə görə, müvafiq paylaşım missiyanın “X” sosial şəbəkəsindəki səhifəsində yerləşdirilib.

"Liviya Ordusunun Baş Qərargah rəisi, general-mayor Məhəmməd əl-Həddadın rəhbərlik etdiyi komitənin yaradılması tərəflərin qarşıdurmasının daha da gərginləşməsinin qarşısını almaq, beynəlxalq insan haqları və beynəlxalq humanitar hüquq çərçivəsində öhdəliklərinə əməl olunmasının təmin olunması öhdəliyini əks etdirir", - missiyanın bəyanatında deyilir.

Missiya həmçinin ötən həftə baş vermiş zorakılıqlar zamanı mülki əhalinin itkiləri ilə bağlı xəbərlərdən narahatlığını ifadə edib və dərhal, daimi və qeyd-şərtsiz atəşkəsə çağırıb.