Azərbaycanın işğaldan azad edilmiş ərazilərində “yaşıl enerji” layihələrinin genişləndirilməsi çərçivəsində Cəbrayılda 240 meqavat gücündə günəş elektrik stansiyasının enerji sisteminə inteqrasiyası üçün yarımstansiya tikilir.

“Report”un Xankəndiyə ezam olunmuş müxbiri xəbər verir ki, bu barədə “AzərEnerji” ASC sədrinin müşaviri Vüqar Əliyev “Enerji təminatı məsələləri üzrə işçi qrupu”nun iclasında deyib.

Onun sözlərinə görə, paralel olaraq “Nobel Energy” şirkəti tərəfindən 100 MVt gücündə günəş elektrik stansiyasının tikintisinə də start verilib.

V. Əliyev qeyd edib ki, ümumilikdə Qarabağ və Şərqi Zəngəzur iqtisadi rayonlarında 500 MVt-a yaxın hidroenerji və 300–400 MVt gücündə günəş enerjisi layihələrinin həyata keçirilməsi nəzərdə tutulur. O əlavə edib ki, Xudafərin və Qız Qalası Su Elektrik Stansiyaları da daxil olmaqla, bölgənin ümumi “yaşıl enerji” potensialı 1 000 MVt-dan artıq qiymətləndirilir.

“Bu isə 2040-cı ilə qədər regionun enerji tələbatının tam şəkildə bərpa olunan enerji mənbələri hesabına ödənməsinə imkan yaradacaq”, - deyə o bildirib.

V. Əliyevin sözlərinə görə, hazırda bölgədə altı yeni hidroelektrik stansiyanın tikintisi planlaşdırılır. Onlardan biri, Sərsəng su anbarı üzərində yerləşən hidroelektrik stansiyadır. Nominal gücü 50 MVt olan bu stansiya hazırda 5–6 MVt rejimində fəaliyyət göstərir. Digər stansiyalar isə əsasən Muxtarçay və Oxçuçay kimi dağ çayları üzərində inşa edilir.