Somali Federativ Respublikasının Prezidenti Həsən Şeyx Mohamud Azərbaycanın qonaqpərvərliyini yüksək qiymətləndirib və bu səfəri strateji tərəfdaşlığın başlanğıcı kimi dəyərləndirib.

Bunu “Report”un Türkiyə bürosuna Somalinin Azərbaycandakı qeyri-rezident səfiri Fathudin Ali Mohamed (iqamətgahı Ankarada yerləşir - red) açıqlamasında bildirib.

Səfir deyib ki, Somali prezidentinin Azərbaycana səfəri çərçivəsində keçirilən görüşlər ölkələr arasında ikitərəfli münasibətlərin inkişafına və möhkəmləndirilməsində mühüm rol oynayır:

“Somali prezidentinin ilk səfəri olan bu tarixi görüş müxtəlif sektorlar üzrə daha dərin əməkdaşlıq üçün zəmin yaratdı. Səfər zamanı hər iki ölkə təhsil, enerji, müdafiə, idarəetmə sahələrində qarşılıqlı inkişaf və əməkdaşlığa sadiqliklərini gücləndirən əsas sazişlər imzaladılar. İnfrastruktur və digər sahələrdə əməkdaşlıq imkanlarını vurğuladılar”.

Səfir qeyd edib ki, bu səfər daha güclü və daha strateji müttəfiqliyə yol açmaqla beynəlxalq tərəfdaşlıqların genişləndirilməsi və ümumi maraqların irəliləyişinə dair ortaq öhdəliyi vurğulayır.

O, hesab edir ki, Somali Prezidentinin Azərbaycanda Səngəçal neft terminalı, Zəfər Parkı və başqa obyektlərlə tanışlığı Azərbaycanın bu istiqamətlərdə təcrübəsinin öyrənilməsi və bilik mübadiləsinin aparılması üçün vacib oldu və bu ikitərəfli əməkdaşlıqda mühüm amildir.

Qeyd edək ki, Somali Federativ Respublikasının Prezidenti Hasan Şeyx Mahmud fevralın 11-dən 14-dək Azərbaycan Respublikasına rəsmi səfər edib.