Səudiyyə Ərəbistanının “AllRig” neft-servis şirkəti Azərbaycanda öz iştirakını genişləndirmək niyyətindədir.

Bu barədə “Report”a şirkətin nümayəndəsi Tamer Azar Bakıda keçirilən “IADC Drilling Caspian 2025” konfrans və sərgisinin kuluarlarında bildirib.

Onun sözlərinə görə, “AllRig” Xəzər regionunda, xüsusilə dərinsulu qazma qurğularına diqqət yetirir və 2025-2026-cı illərdə Azərbaycanda iri layihələrdə iştirak etməyi planlaşdırır.

“Biz potensial sifarişçilərlə danışıqlar aparırıq və qazma qurğularının auditi, qazma, yükqaldırma və fırlanan avadanlıqların yoxlanılması, həmçinin əsaslı təmiri üzrə tenderlərdə iştirak edirik. Gözləyirik ki, bu ilin ikinci rübünə qədər layihələrdə iştirak imkanlarımız barədə daha aydın təsəvvür əldə edəcəyik”, – T.Azar bildirib.

O əlavə edib ki, lokallaşdırma strategiyası çərçivəsində şirkət yerli tərəfdaşlarla əməkdaşlığa üstünlük verir. Bu yanaşma regiondakı mövqeyini gücləndirməyə və birgə layihələrin uğurla həyata keçirilməsinə töhfə verəcək.

“Biz Azərbaycanla uzunmüddətli əməkdaşlığa hədəflənmişik”, - deyə T.Azar vurğulayıb.

Qeyd edək ki, “AllRig” dərinsulu platformaları, yerüstü qazma kompleksləri və digər qazma qurğularının servis xidməti üzrə ixtisaslaşıb.