“Lamiyə işi”ndə geriyə sayım başlayıb. Baş Prokurorluğun yaydığı son açıqlama bunu söyləməyə əsas verir
Baş Prokurorluqdan “AzərTAc”a daxil olan rəsmi məlumatda bildirilir ki, Ədliyyə Nazirliyinin Penitensiar Xidmətinin 4 saylı cəzaçəkmə müəssisəsində cəza çəkən məhbus Lamiyə Quliyevanın ötən ilin oktyabrında uşaq doğması və digər xüsusatlarla bağlı Ədliyyə Nazirliyi və Baş Prokurorluq tərəfindən birgə araşdırmalar aparılır.

Baş Prokurorluğun Ağır cinayətlərə dair işlər üzrə İstintaq İdarəsində aparılan ilkin araşdırmalarla müəyyən edilib ki, L.Quliyeva ümumiyyətlə zorlanmayıb. Həmçinin onun dünyaya gətirdiyi uşağın atasının şəxsiyyəti məlumdur.

Baş Prokurorluqdan bildiriblər ki, L.Quliyevanın 2010-cu ildə Cinayət Məcəlləsinin 317.2-ci (cəzaçəkmə müəssisələrinin və ya istintaq təcridxanalarının normal fəaliyyətini pozma) maddəsi ilə təqsirləndirilməsinə dair məhkəmənin hökmünə gəldikdə isə cəzanın ağırlığı ilə bağlı həmin hökmdən Baş Prokurorluq tərəfindən apellyasiya protesti verilib və yaxın vaxtlarda həmin protestə Apellyasiya Məhkəməsində baxılacaq.

Rəsmi məlumatda diqqət çəkən əsas məqam son cümlədə cəmlənən fikirdir: “Araşdırmalar zamanı qanun pozuntuları halları aşkarlanarsa, bu pozuntulara yol vermiş vəzifəli şəxs və ya şəxslərin məsuliyyətə cəlb edilməsi təmin olunmaqla nəticəsi barədə ictimaiyyətə geniş məlumat veriləcək”.

Baş Prokurorluğun rəsmi mövqeyi ifadə edilən bu açıqlamada “Lamiyə işi”nin hansı istiqamət üzrə aparılacağını təxmin etmək mümkündür. “AzərTAc”ın əsasən ölkə rəhbərliyinin fəaliyyəti ilə bağlı rəsmi xəbərlər yayımladığını və cinayət hadisələri ilə bağlı ardıcıl informasiya tirajlamadığını, belə mövzulara nadir hallarda müraciət etdiyini nəzərə alsaq, məhkum qadının işində kəskin dönüş olduğunu söyləyə bilərik. Bu məsələ ölkə rəhbərliyinin diqqətində olmasaydı, çətin ki, “AzərTAc”ın xəbərləri sırasında yer alardı.

Xüsusilə rəsmi məlumatın son cümləsində ifadə edilən fikir istintaqın dərin araşdırmalara baş vuracağına da şübhə yeri qoymur. Belədə sifariş verənlə sifariş olunanların yerlərinin dəyişəcəyi də gözləniləndir.

“Lamiyə işi”nin sənədləri toplanır, yenidən araşdırma gedir!

Aldığımız son məlumatlar da bunu söyləməyə əsas verir.

Qeyd edilir ki, L.Quliyevanın ana olması xəbəri mətbuatda geniş şəkildə tirajlanandan sonra qadını məhbəsə aparan yol, onun məhbəsdəykən yenidən ittiham edilməsi, nişanlısı olmuş Vüqar Əliyevin ömürlük həbsə məhkum edilməsi “yuxarılar”da ciddi müzakirə mövzusuna çevrilib. Nəticə olaraq isə Ali Məhkəmə sədrinə, baş prokurora cinayət işinin yenidən və obyektiv araşdırılması tapşırılıb. Tapşırıqdan dərhal sonra ilk addım olaraq L.Quliyevanın 2-ci dəfə təqsirləndirilməsinə və cəzasının artırılması ilə bağlı məhkəmə hökmündən Baş Prokurorluq protest verib. Cinayət işinin istintaqı ilə bağlı sənədlər, məhkəmə hökm və qərarları toplanaraq yenidən öyrənilməyə başlanıb. Şəmkir Rayon Prokurorluğunda bu işlə bağlı olan sənədlər də artıq araşdırma predmetidir.

Aslan Aslanovun həbs xəbəri...

Baş Prokurorluğun rəsmi açıqlamasından 1 gün əvvəl Lamiyə Quliyevanın keçmiş nişanlısı Vüqar Əliyevin vəkili Adəm Məmmədovla Aslan Aslanovun mətbuat üzərindən mübahisəsi maraqlı situasiyanı ortaya qoyub.

Fevralın 8-də vəkil A.Məmmədov A.Aslanovun həbs edilməsi ilə bağlı özünün facebook profilində məlumat aldığını yazıb.

Vəkilin fikirlərinə mətbuat üzərindən reaksiya verən A.Aslanov onu ömürlük həbsdə olan müvəkkilinin yanına göndərməklə təhdid edib. “Qafqazinfo”ya açıqlamasında keçmiş icra başçısı deyib: “Yayılan xəbərlər cəfəngiyyatdır. Hazırda öz evimdəyəm. Bu xəbərləri yayan vəkil özü də elə yaxın zamanlarda müdafiə etdiyi şəxsin yanına gedəcək”.

A.Məmmədov isə “Yeni Müsavat”a açıqlamasında A.Aslanovu bir qədər səbrli olmağa çağırıb. Digər tərəfdən isə A.Aslanovun açıqlamasının təhdidedici olduğunu dilə gətirib:

“Fevralın 8-də etibarlı mənbələrdən belə bir məlumat daxil oldu ki, A.Aslanov həbs edilib. Apardığım dəqiqləşdirmələrdən sonra, saat 20.01-də facebookda ”kommentariya" hissəsində öz yekun qeydimi apardım: “Rəsmi orqanlardan elə indicə aldığımız məlumata əsasən, Aslan Aslanovun həbs olunması barədə informasiya təsdiqlənmir, lakin onun həbsi ilə bağlı hazırlıq işləri yekunlaşmaqdadır...” Bu məlumatlar mənim facebook səhifəmdə öz əksini tapıb".

Vəkil bildirib ki, həmin statusu paylaşdıqdan 1 neçə saat sonra Aslan Aslanovun bəzi xəbər portallarında onun barəsində söylədiyi təhdid dolu münasibətini oxuyub: “Aslanova səbrli olmağı məsləhət görürəm. Vüqar Əliyev, Lamiyə Quliyeva 12 ildən artıqdır ki, səbr nümayiş etdiriblər. Onları yanlış olaraq mühakimə ediblər. Onların azadlığı, ailə qurmaq, sərbəst hərəkət etmək, təhsil almaq və digər çoxsaylı hüquqları pozulub. Bəli, ola bilər ki, mənə yanlış məlumat daxil olub. Amma Aslan Aslanovun bir neçə saat sonra məni təhdid etməsinə nə ehtiyac var idi? Gəlin Aslan Aslanovun müsahibəsində verdiyi ifadələrinə nəzər yetirək: ”Hazırda öz evimdəyəm" - çox maraqlı ifadədir. Əgər Aslan Aslanov özünü təqsirsiz hesab edirsə, nəyə görə deyir ki, “hazırda öz evimdəyəm”? Demək ki, Aslan Aslanov hər an həbs oluna biləcəyi təhlükəsi ilə üz-üzə dayandığını çox gözəl başa düşür və hazırki məqam üçün hələ öz evində olduğunu bildirir.

Təqsiri olmayan şəxs ən azından belə bir ifadə işlədərdi: “Mən nəyə görə həbs olunmalıyam? Mən təqsirsizəm!” Məncə, hər şey aydındır. “Bu xəbərləri yayan vəkil özü də elə yaxın zamanlarda müdafiə etdiyi şəxsin yanına gedəcək”... Mənim hüquqlarını müdafiə etdiyim şəxs olan Vüqarın yanına getməyim üçün ömürlük azadlıqdan məhrum olunmağım şərtdir. Çox maraqlıdır, bu dəfə Aslan Aslanov kimlərin dəstəyindən istifadə edərək mənə ömürlük cəza verdirmək niyyətindədir? O şəxsləri tanımağım mənə də maraqlı olardı. Və hətta irəli sürüləcək “ittiham”lar da mənə çox maraqlı gəlir.

Bu məsələdə Aslan Aslanovun məkrli, hikkəli və əsl niyyətlərini ortaya qoyacaq daha yeni faktlar əldə etdim. Aslan Aslanov özü də bilmədən öz ifadəsi ilə insanları özünün “şəxsi qanunları” ilə cəzalandırmaq niyyətini ortaya qoymuş oldu. Bu şəxsin niyyəti yalnız və yalnız insanlara təxribat törətməkdən, insanları həbs etdirərək, cəza evində işgəncələrə məruz qoyaraq, şər-böhtan atdırıb cəza müddətlərini artıraraq məhv etdirməkdən ibarətdir. Yaxın günlərdə Aslan Aslanovun tükürpədici digər əməllərini ictimaiyyətə bəyan edəcəyəm. Bütün cəmiyyət Aslan Aslanovun həqiqətdə kim olduğunu görəcək".

Xatırladaq ki, L.Quliyeva və onun nişanlısı olmuş V.Əliyev 2003-cü ilin may ayında o dövrdə Şəmkirin icra başçısı olan Aslan Aslanovun oğlu Ruslanı öldürməkdə suçlu biliniblər. Məhkəmənin qərarı ilə L.Quliyeva 10 il müddətinə, V.Əliyev isə ömürlük azadlıqdan məhrumetmə cəzasına məhkum olunub. L.Quliyevanın həbs müddəti 2012-ci ildə 5 il 6 ay müddətinə uzadılıb. Əgər bu qərar olmasaydı, 15 yaşında həbs olunan məhkum qadın 2013-cü ilin may ayında həbsdən azad edilməli idi. Belə iddialar var ki, L.Quliyevanın həbs müddəti A.Aslanovun sifarişi ilə uzadılıb.