Əməkdar artisti, Dövlət Musiqili Teatrının aktrisası Gülnar Salmanovanın xatirəsi Musiqili Teatrda yad edilib.

Qurumun Mətbuat xidmətindən Memur.az-a verilən məlumata görə, bununla bağlı olaraq, Üzeyir Hacıbəylinin “Ər və arvad” tamaşası nümayiş olunub.

Xalq artisti Fatma Mahmudova tamaşa boyu G.Salmanovanın ruhunun onlarla bir səhnədə olduğunu deyib: “Tamaşamızın budəfəki nümayişini sənət dostumuz Gülnar Salmanovanın xatirəsinə həsr etdik. Bu barədə tamaşadan əvvəl elan olundu. Bu bizi daha da yaxşı, daha da ilhamla oynamağa sövq etdi. Tamaşa boyu elə bilirdik ki, uzun illər səhnəni bölüşdüyümüz aktrisamızın ruhu da bizimlə burda – bu səhnədə, bu zaldadır”.

“Ölüm haqdır, hamımız bu dünyadan bir gün köçüb gedəcəyik. Amma gələcək nəsillərə bizdən yadigar yaradıcılığımız qalacaq. Allah dünyasını dəyişmiş bütün sənətkarlarımıza rəhmət eləsin. Gülnar xanımın əziz xatirəsi daima qəlbimizdə yaşayacaq”, - deyə mərhum aktrisanın digər sənət dostu Möylə Mirzəliyev söyləyib.

Qeyd edək ki, Gülnar Salmanova 1981-ci ildə Azərbaycan Dövlət İncəsənət İnsitutunun “Musiqili komediya aktyorluğu” fakultəsini bitirib. 1981-ci ildən Musiqili Komediya Teatrında çalışıb. Aparıcı səhnə ustası olub. Güclü və soprano səsə malik idi. Əsasən “Subretka” ampluasında çıxış edirdi. Aktrisanın "50 yaşında cavan” tamaşasındakı Gülnaz, “Beş manatlıq gəlin”də Naznaz, “Özümüz bilərik”də Ceyran, “Subaylarınızdan görəsiniz”də Çarliston, “Bankir adaxlı”da Maral, “Məhəbbət oyunu”nda Ceyran, “Aldın payını, çağır dayını” tamaşasındakı At Balaxanım və başqa obrazları orijinallığı ilə seçilib. Gülnar Salmanova 2001-ci ildə “Azərbaycan Respublikasının Əməkdar artisti” fəxri adına layiq görülüb. Prezident mükafatçısı idi. Xatırladaq ki, G.Salmanova uzun sürən xəstəlikdən sonra oktyabrın 24-də dünyasını dəyişib.