ABŞ Ukraynaya silah tədarükünü və kəşfiyyat məlumatlarının mübadiləsini bərpa edir.

"Report"un UNİAN-a istinadən verdiyi xəbərə görə, bu barədə Səudiyyə Ərəbistanının Ciddə şəhərində Ukrayna-ABŞ danışıqlarının yekunlarına dair birgə bəyanatda bildirilib.

“ABŞ kəşfiyyat məlumatlarının mübadiləsində fasiləni dərhal aradan qaldırır və Ukraynaya təhlükəsizlik yardımını bərpa edir”, - bəyanatda qeyd olunub.

Mətndə, həmçinin vurğulanıb ki, Vaşinqton və Kiyev davamlı sülhün bərpası istiqamətində mühüm addımlar atıb. Bu kontekstdə hər iki ölkənin nümayəndələri dövlətini müdafiə edən Ukrayna xalqının cəsarətini yüksək qiymətləndiriblər və uzunmüddətli sülhün bərqərar olması prosesinə indi başlamağın vaxtı olduğu ilə razılaşıblar.

Xatırladaq ki, hərbi yardım və kəşfiyyat məlumatlarının mübadiləsi fevralın 28-də Ağ Evdə Ukrayna Prezidenti Volodimir Zelenski ilə amerikalı həmkarı Donald Tramp arasında baş verən mübahisədən qısa müddət sonra dayandırılmışdı.