Hikmət Hacıyev Azərbaycana qarşı aparılan təbliğatdan danışdı » Memur.az

Hikmət Hacıyev Azərbaycana qarşı aparılan təbliğatdan danışdı

Hikmət Hacıyev Azərbaycana qarşı aparılan təbliğatdan danışdıXarici İşlər Nazirliyinin (XİN) mətbuat xidmətinin rəhbəri Hikmət Hacıyev Nyu-Yorkda BMT Baş Assambleyasının İnformasiya məsələləri üzrə Komitəsinin iclasında iştirak edib.

Nazirlikdən Oxu.Az-a verilən məlumata görə, toplantıda çıxış edən XİN rəsmisi ənənəvi və onlayn media, həmçinin sosial şəbəkələr vasitəsilə saxta xəbərlər, dezinformasiyanın yayılması və təbliğat fəaliyyətinin həyata keçirilməsinin ifadə azadlığını ciddi şəkildə pozduğunu qeyd edərək, “ideoloji təcavüz”, “informasiya müharibəsi” və ya “hibrid müharibə” kimi fəaliyyətlərin beynəlxalq sülh və təhlükəsizlik üçün ciddi təhdid yaratdığını vurğulayıb.

Bu xüsusda, XİN rəsmisi BMT Baş Assemblyasının hələ 1947-ci ildə 108-ci plenar iclasında “Təbliğata qarşı tədbirlər” adlı qətnamə qəbul edərək sülhə qaşı təhdidi, sülhün pozulmasını və ya təcavüz aktını ruhlandıran bütün növ təbliğat formalarını qınadığını xatırladıb və Azərbaycanın təcrübəsini bölüşüb:

“SSRİ-nin dağılması dövründə və müstəqilliyin ilk illərindən Azərbaycan Ermənistanın yürütdüyü “informasiya təcavüzü” və “informasiya müharibəsi” ilə üzləşib.

Ermənistan BMT nizamnaməsinə zidd olaraq, gücdən istifadə etməklə Azərbaycana qarşı hərbi təcavüz və işğalı, işğal olunmuş ərazilərdə bir milyondan artıq azərbaycanlıya qarşı törətdiyi qanlı etnik təmizləməni gizlətmək üçün informasiya müharibəsi, təbliğat və dezinformasiya əməllərinə əl atıb. Erməni lobbi dairələrinin dəstəyilə bu tendensiya “hibrid müharibə” formasında bu gün də Azərbaycana qarşı davam etməkdədir”.

H.Hacıyev Ermənistanın beynəlxalq media nümayəndələrini çaşdıraraq müxtəlif bəhanələrlə Azərbaycanın işğal olunmuş ərazilərinə qanunsuz səfərlərə sövq edilməsi məsələsinə diqqəti çəkərək, bəzi hallarda bu kimi səfərlərin etik və obyektiv jurnalistika prinsiplərinə zidd olaraq, təbliğat məqsədilə istifadə olunduğunu nəzərə çatdırıb:

“Biz beynəlxalq media nümayəndələrinin informasiya əldə etmək hüququna hörmətlə yanaşırıq. Amma xüsusilə münaqişə zonalarında fəaliyyət zamanı dövlətlərin akkreditasiya qaydlarına, sərhəd keçid rejimlərinə, qanunlarına və ərazi bütövlüyünə hörmətlə yanaşılmalı, həmçinin münaqişəyə birtərəfli və qeyri-obyektiv yanaşma olmamalıdır”.

Ermənistan-Azərbaycan Dağlıq Qarabağ münaqişəsinin Azərbaycana qarşı olan yeganə təbliğat və disinformasiya mənbəyi olmadığını deyən H.Hacıyev Birinci Avropa Oyunları dövründə ölkəmizə qarşı aparılan və hətta “psixoloji müharibə” səviyyəsinə çatdırılan təbliğat və dezinformasiya kampaniyaları barədə ətraflı danışıb və bir çox aparıcı media orqanlarının bu prosesdə iştirak etməsinin təəssüf və narahatlıq doğurduğunu vurğulayıb.

O, hər hansı bir fakt ortaya qoymadan və cavab hüququna imkan vermədən Azərbaycana qarşı bu qəbildən olan qarayaxma və dezinformasiya kampaniyalarının hələ də aparıldığını BMT tribunasından beynəlxalq ictimaiyyətin diqqətinə çatdırıb.

Bu kimi təbliğat və dezinformasiya əməllərinə qarşı mübarizədə Azərbaycanın media plüralizminin inkişafı və medianın peşəkarlığının artırılmasının dəstəklənməsinə üstünlük verdiyini qeyd edən H.Hacıyev medianın müstəqilliyini qorumaqla və ona hörmət etməklə ölkəmizin medianın inkişafı üçün müxtəlif proqramlar həyata keçirdiyi barədə danışıb. Həmçinin, cəmiyyətin savadlılıq və məlumatlılıq səviyyəsinin yüksək olmasının xüsusən xaricdən qaynaqlanan təbliğat və dizinformasiyaya qarşı effektiv vasitə olduğunu bildirib.

O, bu sahədə BMT-nin rolunun artırılmasının vacibliyinə toxunub və BMT-nin strateji kommunikasiya siyasətinə dəstək məqsədilə ölkəmizdə milli səviyyədə BMT-nin məqsəd və məramlarının, Davamlı inkişaf məqsədlərinin təşviq olunması istiqamətində media müstəvəsində həyata keçirilən tədbirlər barədə məlumat verib.

H.Hacıyev BMT-nin gələcək qlobal kommunikasiya fəaliyyətində multikultarilizm və sivilizasiyalararası dialoq məsələlərinə xüsusi diqqət yetirilməsinin vacibliyini bildirib.

Bununla bərabər, o, BMT Təhlükəsizlik Şurasının Ermənistan-Azərbaycan Dağlıq Qarabağ münaqişəsi ilə əlaqədar qəbul etdiyi qətnamələrinin yerinə yetirilməməsinin Azərbaycan ictimaiyyətində haqlı və əsaslı suallar yaratdığını qeyd edərək, BMT-nin informasiya strategiyasının effektivliyini artırmaq üçün qəbul edilmiş qətnamə və qərarların icrasının vacibliyinə diqqətə çəkib.

Qeyd edək ki, BMT Baş Assambleyasının İnformasiya Komitəsi 1979-cu ildə təsis olunub və komitənin mandatına BMT-nin ictimai informasiya siyasətinin müəyyən edilməsi, dünyada yeni, ədalətli və effektiv informasıya məkanının yaradılması ilə sülhün gücləndirilməsinə töhfə vermək kimi məsələlər daxildir.

Memur.az