Bolqarıstan Xalq Məclisinin sədri Nataliya Kiselova Azərbaycan Milli Məclisinin sədri Sahibə Qafarovanı Bolqarıstana rəsmi səfərə dəvət edib.

“Report” Bolqarıstan parlamentinə istinadən xəbər verir ki, bu məsələ Qafarova və Kiselovanın ötən gün Bakıda keçirilən görüşündə müzakirə olunub.

Danışıqlar zamanı N.Kiselova vurğulayıb ki, Sofiya Bolqarıstanın Azərbaycandan və digər mənbələrdən təbii qazın paylanması üzrə mühüm regional mərkəz kimi rolunu gücləndirmək üçün səylərini davam etdirmək niyyətindədir: "Əminik ki, bu əməkdaşlığın inkişafı hər iki ölkəyə böyük fayda gətirəcək".

N.Kiselova həmçinin nəqliyyat-logistika əməkdaşlığının dərinləşdirilməsinin vacibliyini qeyd edərək, Transxəzər Beynəlxalq Nəqliyyat Marşrutunun (TBNM və ya Orta Dəhliz) strateji əhəmiyyətini xüsusi vurğulayıb.