Avrasiya İqtisadi İttifaqı (Aİİ) və Avropa İttifaqında (Aİ) eyni zamanda olmaq mümkün deyil, lakin qərar Ermənistanındır. Harada olmağın daha yaxşı olduğunu o müəyyən etməlidir.

“Report” xəbər verir ki, bunu Rusiya xarici işlər nazirinin müavini Mixail Qaluzin “RİA Novosti”yə deyib.

"Ümid edirik ki, Ermənistan cəmiyyətinə Aİİ-yə üzvlüyün bütün faydaları və təşkilatdan çıxmağın zərərləri tam miqyasda izah ediləcək ki, Ermənistan cəmiyyətinin reallıq haqqında obyektiv təsəvvürü olsun", - o bildirib.

M.Qaluzin vurğulayıb ki, Aİİ bərabərhüquqlu dövlətlərin birliyidir, Aİ isə "reallıqdan uzaqlaşmış Brüssel bürokratları tərəfindən müəyyən edilən anti-Rusiya narrativlərinə tabe olan intizamın hökm sürdüyü" bir quruluşdur.

Xatırladaq ki, Aİ-yə üzvlük prosesinin başlanması haqqında qanun layihəsini bir sıra ictimai və siyasi təşkilatlar irəli sürüb və bunun üçün ölkə vətəndaşlarından 60 min imza toplanıb.