Birinci Avropa Oyunlarının məşəl estafeti Yevlaxdan sonra Bərdəyə gətirilib. Apasport.az saytının məlumatına görə, Avropa Oyunları rəmzi qapısında məşəli rayonun fəal gənclərindən olan Səxavət İsmayılov qəbul edib.

Heydər Əliyev prospekti boyunca 3052 metr məsafədə hərəkət edən estafet şəhərin mərkəzi meydanına gətirilib. Sonuncu məşəlçi Fuad Ağayev səhnəyə qalxaraq çırağı alovlandırıb.

Birinci Avropa Oyunlarının simvolu yandırılaraq bərdəlilərə təqdim olunub. Qaydaya görə, qarşılanma mərasimi və Alov festivalı keçirilən rayonlara təqdim edilən rəmzi çıraqlar Avropa Oyunları başa çatanadək söndürülə bilməz. Həmin çıraqdan götürülən odla növbəti rayonlara aparılan məşəllər yandırılır.

Bərdədə qarşılanma mərasimindən sonra Alov festivalı keçirilib.

Bu gün məşəl Goranboy və Naftalanı gəzəcək.