Gündəlik qida tələbatımız olan tərəvəz və ərzaq məhsullarını daha çox bazardan almağa üstünlük veririk. Məhsulun istehsal olunduğu tarixə nəzər yetirsək də, harada saxlanıldığı, hansı şəraitdə satıldığı bizi o qədər də düşündürmür.

TTV (Region TV) xəbər verir ki, Goranboy bazarında bu istiqamətdə vəziyyət heç də ürəkaçan deyil. Məkanın şəraiti, anti-sanitar vəziyyət sakinləri, sözün əsl mənasında, təngə gətirib. Satıcı və alıcıların müraciətindən sonra əməkdaşımız sözügedən bazara gedərək vəziyyətlə tanış olub.

Goranboyun mərkəzi bazarında vəziyyətin nə qədər acınacaqlı olduğunu görmək üçün elə içəri daxil olub ümumi mənzərəni gözdən keçirmək kifayətdir. Kadrlardan da göründüyü kimi, mərkəzi bazarın vəziyyəti çox acınacaqlıdır. Bir sözlə, bazarda küçə ticarəti baş alıb gedir. Mərkəzin içərisindəki ab-hava küçədəki xaosdan heç də geri qalmır. Satıcılar isə bazarın daxilində əlverişli yer tapa bilmədiyinə görə məcbur olub kənarda, bataqlıqda ticarətə davam edirlər.

Xoşagəlməz mənzərə bir yana qalsın, üfunət iyinin verdiyi narahatlığı sözlə ifadə etmək olduqca çətindir. Xarab meyvə-tərəvəz və digər məhsulları zibil qabına atmaq əvəzinə bazarın daxilində "mini" zibilxana düzəldənlər, görünür, etdiklərinin fərqində deyillər. Çala-çuxurlara görə sakinlər normal halda hərəkət etməkdə çətinlik çəkirlər, lakin bu vəziyyətdə bazara avtomobillər də daxil olur. İzdihamı təsəvvür etmək asandır. Bir tərəfdə çuxur, birində zibil, digərində isə maşın və insanlar. İndi bacarırsansa hərəkət elə...

Alıcılarınsa əsəbləri tarıma çəkilib. Alınan hər bir məhsul infeksiya mənbəyidir. Xüsusilə də açıq halda satılan məhsullar. Yağış yağanda isə elə sakinlərin öz dili ilə desək, ya gərək uzunboğaz çəkmə geyəsən, ya da balaca qayıqla hərəkət edəsən.

Məsələ ilə bağlı Goranboy rayon Gigiyena və Epidemiologiya Mərkəzinə müraicət etdik. Mərkəzdən bildirdilər ki, problemdən agahdırlar. Qurumun direktoru Afayət Köçərli TTV-yə bazar rəhbərliyi ilə bacara bilmədiyini etiraf etdi. Onun sözlərinə görə, sözügedən bazara dəfələrlə baxış keçirilib, antisanitariya vəziyyətinin aradan qaldırılması üçün 2 dəfə cərimə tətbiq edilib. 3-cü və sonuncu dəfə, artıq bazarın bağlanılması üçün tədbir görüləcək. Məsələ ilə bağlı bazar rəhbərliyİNə müəyyən vaxt verilib.

Köhnə bazarda isə acınacaqlı vəziyyəti aradan qaldırmaq üçün yenilənməyə, təmirə ehtiyac var. Təəssüflər olsun ki, sahibkarları sanitar-gigeynik vəziyyətdən çox, mümkün qədər artıq gəlir əldə etmək maraqlandırır.