Azərbaycanın Əlcəzairdəki səfiri Tural Rzayev bu ölkənin Xarici İşlər Nazirliyinin dövlət katibi Səlma Baxta Mənsuri ilə Afrika və beynəlxalq məsələləri müzakirə edib.

“Report” xəbər verir ki, bu barədə Afrika ölkəsinin Xarici İşlər Nazirliyinin mətbuat xidməti məlumat yayıb.

“Bu gün (yanvarın 30-da – red.) nazirliyin mənzil–qərargahında Mənsuri Sloveniyanın, Cənubi Koreyanın, Azərbaycanın Əlcəzairdə akkreditə olunmuş səfirləri xanım Urşka Mendak, cənab Yu Kiyun, cənab Tural Rzayevi nəzakət ziyarəti çərçivəsində qəbul edib”, – xarici siyasət idarəsinin feysbuk səhifəsində bildirilib.

Qeyd olunub ki, görüşlərdə Afrika və beynəlxalq məsələlər üzrə fikir mübadiləsi aparılıb, habelə əməkdaşlığın inkişafı yolları müzakirə edilib. Vurğulanıb ki, bu görüşlər “həmçinin ümumi prioritet sahələrində əməkdaşlığın inkişaf perspektivlərini nəzərdən keçirmək imkanı yaradıb”.