Oktyabrın 9-da Azərbaycan Dövlət Gənc Tamaşaçılar Teatrında istedadlı yazıçı-dramaturq Pərvinin "Səhnə" adlı yeni kitabının təqdimat mərasimi keçirildi.


Milli.Az bildirir ki, təqdimat mərasimində çıxış edən AYB -nin katibi Rəşad Məcid diqqətə catdırdı ki, kitaba Pərvinin müxtəlif illərdə teatr sahəsində çalışan sənət adamları ilə müsahibələri, tamaşalar haqqında resenziyaları, pyesləri və Bakı Beynəlxalq Teatr Konfranslarında qələmə aldığı məqalələr yer alıb. Kitabın təqdimatının ADGTT-da keçirilməsi də əbəs deyil. Çünki, bu teatrda Pərvinin 4 əsərinə quruluş verilib və bu tamaşalar nəinki ölkəmizdə hətta Rusiyanın bir sıra şəhərlərində də uğurla nümayiş edilib. Rəşad Məcid bildirdi ki, kitab Mədəniyyət və Turizm Nazirliyi ilə "525-ci qəzet"in birgə layihəsidir. Qarşıda digər bir layihə isə Azərbaycan kinosunun 120 illiyinə həsr ediləcək kitab olacaq.

Tədbirdə iştirak edən mədəniyyət və turizm nazirinin müavini Ədalət Vəliyev gənc yazarı təbrik edərək bildirdi ki, Pərvin ciddi yazılarla özünü təqdim etməyi bacarıb. Ona cəmiyyətin, elmi ictimaiyyətin, ədəbi mühitin münasibətini görürəm. Pərvin tamam yeni təfəkkürə malik olan, ədəbiyyat havasında yaşayan, düşüncələrində, baxışlarında orijinallıq nümayiş etdirən, heç kəsə bənzəməyən, yeni nəslin ən aparıcı nümayəndələrindən biridir. Ona böyük yaradıcılıq uğurları arzulayan nazir müavini Bakı Beynəlxalq Teatr Konfransında yazıçının yaxından iştirakını yüksək dəyərləndirdi. Bildirdi ki, o gənc yazar olaraq səmərəli fəaliyyətinə görə bir çox mükafatlara layiq görülüb. Teatr Forumu çərçivəsində gənc yazarla baş tutan tanışlıq onun teatr sahəsindən mütəmadi yazılarına və forumun daimi itirakçısına çevrilməyinə şərait yaratdı. O, teatrsevərləri yaddaqalan yazılarla sevindirir. Bu gün Pərvinin əsərləri paytaxt teatrları ilə yanaşı regionlarda da səhnəyə qoyulur. Onun Anarın yaradıcılığına müraciət edərək dissertatsiya müdafiə etməsi də bizləri çox sevindirir. O, yazıçı, dramaturq, müəllim kimi daim fəaliyyətdədir. Bu fəaliyyətdə ona uğurlar arzulayıram. Tədbirdə çıxış edən AYB-nin sədri, Xalq yazıçısı Anar, yazıçı Sabir Rüstəmxanlı, Xalq artsiti, rejissor Ramiz Həsənoğlu, Əməkdar incəsənət xadimi Bəhram Osmanov, dramaturq Əli Əmirli, .BDU-nun Jurnalistikanın nəzəriyyəsi və təcrübəsi kafedrasının müdiri, professor Cahangir Məmmədli, Azərbaycan Dövlət Pedaqoji Universitetinin Azərbaycan ədəbiyyatı tarixi kafedrasının müdiri, Himalay Qasımov, Türkiyənin Azərbaycandakı səfirliyinin mədəniyyət və turizm müşaviri İrfan Çiftçi Pərvinin yazılarının məziyyətlərindən, şəxsi keyfiyyətlərindən söz açdılar. Bildirdilər ki, Pərvin gənc yazar olaraq ədəbiyyata yeni bir nəfəs gətirib. Pərvinin Anar müəllimin yaradıcılığına müraciətinin, onu bu qədər dərindən öyrənməyinin bir böyük səbəbi də Anarın hər iki baxımdan dərin fəlsəfəsinin, azərbaycançılıq ideyasının qabarıq olmasındadır. İstər Anar haqqında yazdığı sanballı kitabı ilə, istərsə də bu əsərləri ilə Pərvin nə qədər dərin, tükənməz bir təfəkkürə malik olduğunu göstərir. Çıxışçılar vurğuladılar ki, gənc yazarın yeni kitabı da maraqla qarşılanacaq və yüksək uğur əldə edəcək. Sonda müəllif, Pərvin Nurəliyeva ad günü ərəfəsində təqdim edilən kitabın ərsəyə gəlməsində ona dəstək olan hər kəsə dərin təşəkkürünü bildirdi. Diqqətə çatdırdı ki, insanın ətrafında onu sevən insanlar varsa, sürətlə ötüb keçən illər ona təsir edə bilməz. Mən özümü peşəkar teatrşünas, dramaturq hesab etmirəm. Kitabda qələmə aldıqlarım sənətə, səhnəyə olan sevgimin nəticəsidir. Bu sənət dünyasında isə mənə dəstək olan Mədəniyyət və Turizm Nazirliyi, Azərbaycan Yazıçılar Birliyi, "525-ci qəzet"in kollektivi , təhsil aldığım və hazırda dərs dediyim Azərbaycan Dövlət Pedaqoji Universitetinin və əlbəttə ki, Azərbaycan Dövlət Gənc Tamaşaçılar Teatrının rəhbərliklərinə dərin təşəkkürümü bildirirəm. Xalq yazıçımız Anarın qəhrəmanları, onların hissləri, düşüncələri mənə o qədər mənəvi qida verirdi ki, oradan aldığım enerjini, ruhu həm də bu layihələrə yönəldirdim. İnanıram ki, bu sevgi hər zaman mənimlə olacaq