Qazaxıstan Azərbaycanla ticarət dövriyyəsini 1 milyard dollara çatdırmağa çalışır və öz mallarının ixracını artırmağa hazırdır.

"Report"un Qazaxıstan bürosu xəbər verir ki, bu barədə ölkənin Baş nazirinin müavini - xarici işlər naziri Murat Nurtleu bildirib.

"Bizim belə məqsədimiz var. Buna görə də biz bu cür səfərlər təşkil edir və fikir mübadiləsi aparırıq. Qazaxıstan Azərbaycana taxıl ixrac etməyə hazırdır və Bakıda taxıl terminalının genişləndirilməsinin vacibliyini görür. Bundan əlavə, yağlı bitkilər, düyü və arpa tədarükünü artırmaq üçün əhəmiyyətli ehtiyatlarımız var", - Qazaxıstan XİN başçısı bildirib.

O vurğulayıb ki, Bakı ilə Astana arasında iqtisadi əlaqələrin gücləndirilməsi üçün biznes də mühüm rol oynayır.

XİN başçısı qeyd edib ki, Qazaxıstanda Azərbaycandan 1518 biznes nümayəndəsi fəaliyyət göstərir.

"Eyni zamanda, Azərbaycanda Qazaxıstan biznesinin fəallığı da artır. Ölkədə 150 Qazaxıstan şirkəti fəaliyyət göstərir. Bu, bizim üçün limit deyil və ümid edirik ki, rəqəm artacaq. Ötən il aparılan danışıqlar zamanı biz keçən il yaradılmış Azərbaycan-Qazaxıstan birbaşa investisiya fondunun resurslarından səmərəli istifadə barədə razılığa gəldik. Bu fondun ilk layihəsi Bakıda Ələt dəniz ticarət limanında intermodal terminalın tikintisi olacaq", - M.Nurtleu bildirib.