Bu ilin yanvar-oktyabr aylarında Azərbaycan İtaliyaya 5 850 955,99 min ABŞ dolları dəyərində 9 252 135,76 ton neft ixrac edib. Bununla da İtaliya Azərbaycanın ümumi neft ixracında birinci yerdə qərarlaşıb.

Dövlət Gömrük Komitəsinin hesabatında verilən məlumata görə, Azərbaycanın ümumi neft ixracında (ixrac edilən neftin həcminə və dəyərinə görə - red.) ikinci yerdə İsrail qərarlaşıb. Hesabat dövründə, bu ölkəyə 1 320 085,61 min dollar dəyərində 2 154 667,42 ton neft ixrac edilib.

Azərbaycanın neft ixracı üzrə siyahıda üçüncü yeri Hindistan tutur. Yanvar-oktyabr aylarında bu ölkəyə 817 429,58 min dollar 1 370 600,87 ton neft ixrac edilib.
Məlumata əsasən, qeyd olunan göstəricilərdə hesabat dövründə gömrük orqanlarında rəsmiləşdirilməsi başa çatdırılmış ixrac olunan neftin dəyərinə dair məlumatlar nəzərə alınıb. Siyahıdan göründüyü kimi, hesabat dövründə 22 ölkəyə 13 785 636,21 min dollarlıq 22 268 796,30 ton neft ixrac edib.