May ayının 17-də Cəlilabad şəhər 2 sayılı tam orta məktəb və Alar kəndi 1 sayılı tam orta məktəbində Uşaqların təhsildən yayınmasının qarşısının alınması məqsədi ilə maarifləndirici seminar keçirilmişdir. Tədbirdə Maarifçi Qadın İctimai Birliyinin sədri Şərqiyyə Məmmədova, pedaqoq Məhluqə Əzizova, milli qəhraman anası Rəfiqə Əsgərova iştirak etmişdir..

Tədbirdə iştirak edən rayon icra hakmiyyəti başçısının müavini, İctimai-siyasi və hümanitar məsələlər şöbəsinin müdiri Dürdanə Əliyeva çıxış edərək , ölkədə xeyli sayda azyaşlı və yetkinlik yaşına çatmamış qız uşaqlarının icbari təhsildən kənarda qalması hallarının olduğunu qeyd edib. Bu problem xüsusilə Bakı kəndlərində, Azərbaycanın cənub və şumal-qərb rayonlarında özünü biruzə verir. Qızlar ya ümumiyyətlə məktəblərə getmir, ya da ibtidai siniflərdən başlayaraq orta məktəbi tərk edirlər. Araşdırmalar zamanı qızların təhsildən erkən ayrılmasının əsas səbəbi kimi valideynlərin təzyiqləri, uşaqların oxumaq istəməməsi və ailələrin maddi imkansılığı göstərilir. Bəzi valideynlər bildirirlər ki, qızlarını yuxarı siniflərdə oxumağa buraxmaq düzgün deyil. Çünki toplum yeniyetmə qızların məktəbə getməsini yaxşı qarşılamır. Valideynlər guya bununla qızlarını kənar təsirlərdən qorumağa çalışırlar. Lakin qızların məcburi orta təhsildən ayrılması cəmiyyətdə bir sıra problemlərə, savadsız qadın ordusunu yaranmasına, erkən nikahlara, qadına qarşı zorakılığa şərait yaradır. Cəlilabad rayonunda keçən illərə nisbətən erkən yaşda ailə quran qızların sayında azalma olsa da problemin kökündən həll olunmur, bəzi ailələrdə bu məsələyə çox diqqətsiz yanaşılır və qız uşaqları hələ 5 və ya 6-cı sinifdən məktəbdən uzaqlaşdırılaraq erkən yaşda ailə qurmağa məcbur edilir. Bir qızın təhsil alması gələcəkdə həm savadlı qadın, həm də dünyagörüşlü bir ananın olması deməkdir. Savadlı anaların isə gələcəkdə düzgün cəmiyyətin qurulmasında əhəmiyyəti böyükdür.
Hələ təhsil alma yaşında olan bir qızın ailə qurmağa məcbur edildiyini söyləyən D.Əliyeva həmin qız uşağının psixoloji travma almasına və gələcəkdə zəif, mövqesiz insana çevrilməsinə səbəb olduğunu bildirdi. Bundan başqa uşaqlar bu və ya digər səbəblərdən məktəbdən yayınırlar. Bunlardan uşaqların dini mərasimlərə cəlb edilməsi ,əməklərinin istismarı, gəlir mənbəyi kimi onlardan istifadə olunması və.s göstərilə bilər. 20 il ərzində Azərbaycanda təhsil sahəsində ciddi nailiyyətlər əldə edildiyini qeyd edən D.Əliyeva bu nailiyyətlərin təhsil sahəsində həyata keçirilən çoxsaylı layihələr, dövlətin bu sahəyə yönəltdiyi diqqət nəticəsində mümkün olduğunu bildirdi. Artıq bu bir faktdır ki, ölkənin təhsil sahəsində əldə edilən uğurları, gənclərin yüksək biliyə yiyələnmə göstəriciləri ildən-ilə artmaqdadır. Dövlətin bu sahəyə ciddi yanaşmasının nəticəsidir ki, hər il təhsil sahəsinə ayrılan vəsaitlərin həcmi artmaqda davam edir. Sonda D.Əliyeva Uşaqların təhsildən yayınmasının qarşısının alınması üçün bu cür tədbirlərin zəruriliyindən, valdeynlər və şagirdlər arasında maarifləndirmənin vaxtaşırı aparılmasından danışdı.(Jam.az)

Memur.az